Abdixhiku tregon pse kosovarët paguajnë naftën më së shtrenjti në rajon

Lumir Abdixhiku thotë se gjatë gjithë kohës naftarët kosovarë janë arsyetuar se ngritja e çmimit të naftës në Kosovë është si pasojë e ngritjes së çmimit nëpër bursa ndërkombëtare.

Sipas të parit të Institutit Riinvest, kjo do të nënkuptonte se edhe ulja – eventuale – do të ndodhte njëtrajtësisht.

“Por tash që çmimi i naftës nëpër botë ka rënë për plot 54% – nga 115 dollarë në 53 dollarë për një barrel (apo 119 litra) – në Kosovë rënia nuk po kalon as 16%. Pra kur gjithë bota rritë çmimet, naftarët tanë janë të përpiktë në ndjekje të menjëhershme; por kur çmimet përgjysmohen nëpër botë dhe arrijnë nivele rekorde të ulëta, të tanët i ulin për vetëm 16%”, ka thënë Abdixhiku.

Në këso rrethanash, Abdixhiku i sheh dy konkluzione.

“I pari (spekulativ) që naftarët kanë ndonjë marrëveshje në mes veti për kurdisje dhe mosulje të çmimeve, për çfarë do të duhej të hetoheshin urgjentisht nga autoritetet e konkurrencës; dhe i dyti, që nuk ka mjaftueshëm konkurrencë në mes furnitorëve të naftës (jo shitësve të shumtë të pompave – por furnitorëve). Në këtë rrethanë, ne do të duhej ndoshta të mendonim ose për rritje të konkurrencës me licencime shtesë ose për kalim në një treg të rregulluar e me një rregullator çmimcaktues – sikurse tek tregu i energjisë elektrike – kjo e dyta më pak e preferuar”, ka thënë Abdixhiku.

Sipas tij, në të dyja rastet, gjithsesi, çmimeve të larta të naftës i frynë edhe vet Qeveria e Kosovës, e cila merr plot 35 centë akcizë për secilën litër që blejmë (plus 16% shtesë si TVSH).

“Them ta ulim atë sepse është e pakuptimtë që kosovarët të paguajnë akcizë sa vet vlera e një litre nafte (sot çmimi i një litre nafte në bursë është 0.37 centë). Sepse nafta nuk është produkt luksi – është produkti më bazik për secilin produkt tjetër që prodhohet e krijohet në Kosovë”.