Pacolli: Vendimet e gjykatave po injorohen, Aeroporti i Vlorës vazhdon të mbahet i bllokuar

Tiranë – Biznesmeni dhe investitori Behgjet Pacolli ka reaguar sërish lidhur me situatën në Aeroportin Ndërkombëtar të Vlorës, duke deklaruar se, pavarësisht vendimeve të formës së prerë të gjykatave që, sipas tij, kanë shfuqizuar të gjitha masat e mëparshme të sigurisë si të pabazuara në ligj, hyrjet në aeroport vazhdojnë të mbeten të bllokuara.

Në një reagim publik, Pacolli thekson se kërkesa e vetme e kompanisë është zbatimi i ligjit dhe respektimi i vendimeve gjyqësore, me qëllim që të mundësohet vazhdimi i punimeve dhe vënia në funksion e projektit, të cilin e cilëson një investim strategjik me vlerë prej qindra milionë eurosh në interes të Shqipërisë dhe qytetarëve të saj.

Ai u ka bërë apel institucioneve përgjegjëse që të ndërmarrin veprimet e nevojshme për të mundësuar operimin e Aeroportit Ndërkombëtar të Vlorës, në përputhje me kontratën e koncesionit dhe vendimet e gjykatave.

Pacolli ka kërkuar gjithashtu që të identifikohen dhe të mbahen përgjegjës, sipas ligjit, të gjithë ata që, sipas pretendimeve të tij, kanë bllokuar në mënyrë të kundërligjshme këtë projekt dhe vazhdojnë të pengojnë funksionalizimin e tij.

Sipas Pacollit, zbatimi i vendimeve gjyqësore dhe rikthimi i qasjes në kantier janë hapa të domosdoshëm për përfundimin e një prej projekteve më të rëndësishme infrastrukturore në Shqipëri./rajonipress/