Gjilani heq taksën komunale për bizneset dhe fal borxhet e akumuluara nga viti 2000

Gjilan – Kuvendi Komunal i Gjilanit ka miratuar propozimin e Drejtorisë për Zhvillim Ekonomik për heqjen e taksës komunale për bizneset, si dhe faljen e të gjitha borxheve të akumuluara nga kjo taksë për periudhën 2000–2026.

Me këtë vendim, bizneset në Komunën e Gjilanit lirohen nga pagesa e kësaj takse, ndërsa detyrimet e krijuara ndër vite për këtë kategori do të falen.

Sipas Komunës së Gjilanit, vendimi synon lehtësimin e barrës financiare për bizneset dhe krijimin e një klime më të favorshme për zhvillimin e sektorit privat dhe ekonomisë lokale.

Falja e borxheve të akumuluara për periudhën 2000–2026 synon gjithashtu t’u japë fund detyrimeve të vjetra që kanë vazhduar të figurojnë ndër vite në evidencat e bizneseve.

Komuna e Gjilanit, përmes Drejtorisë për Zhvillim Ekonomik, ka deklaruar se do të vazhdojë me masa që synojnë mbështetjen e bizneseve, nxitjen e investimeve dhe krijimin e kushteve më të përshtatshme për zhvillimin ekonomik të qytetit./rajonipress/