Reagon Bujar Nevzati: Po ndodhë degradimi – shkatërrimi i hapësirave gjelbëruese në Gjilan

Gjilan – Gjilani po përjeton një degradim të vazhdueshëm sa i përket hapësirave gjelbëruese. Nga parqet te sheshet, nga gjelbërimi urban deri te këndet e lodrave për fëmijë ,çdo gjë po shkon drejt rrënimit, e fajtor për këtë është qeverisja komunale që për çdo ditë e më shumë po dëshmon papërgjegjësi dhe mungesë vizioni ka shkruar Bujar Nevzati.

Postimi i plotë:

Babai im( tashmë i ndjerë), para më shumë se 40 vitesh, më thoshte:
“Biro, gjërat i bon lehtë po problemi është te mirëmbajtja e tyre.”
E kjo thënie sot vlen më shumë se kurrë. Edhe ky kryetar komune, që po premton kaq shumë parqe të reja, nuk është në gjendje as t’i mirëmbajë ato që i ka gjetur të gatshme e lëre më të ndërtojë të tjera.

Është e lehtë të shpenzosh taksat e qytetarëve për fasada, por është shumë më e vështirë të menaxhosh me përgjegjësi, me plan afatgjatë dhe me kujdes çdo ditë ambientin.

Parqet nuk janë vetëm dekor, ato janë frymëmarrja e qytetit. Dhe kur ato lihen pas dore, është vetë jeta urbane që rrënohet.

Qyteti ka nevojë për kujdes, jo për shkatërrim. Për punë të qëndrueshme, jo për improvizime. Dhe mbi të gjitha, për njerëz që e kuptojnë se pushteti është përgjegjësi, jo privilegj.

Bujar Nevzati-shef i grupit të këshilltarëve të PDK-së.