Shyqeri Mahmuti, polici që u kujdes për sigurinë në Grykën e Karadakut dhe kudo në Kosovë

Gjilan – Në një aksident trafiku që ndodhi të martën në rrugën Prishtinë – Gjilan, pranë liqenit të Badovcit, humbi jetën polici nga Gjilani, Shyqeri Mahmuti i cili së fundit shërbente në stacionin policor në Zhegër. Shyqeri Mahmuti ishte polic i sinqertë, i edukuar dhe i cili e donte profesionin. Bashkëvendësi e tij flasin me admirim për kontributin e tij në ruajtjen dhe sigurinë e Grykës së Karadakut.

Shyqeri Mahmuti po voziste me një “Renault”, derisa u përplas për vdekje me dy automjete të tjera, një veturë dhe një kamion.

Gjilanasit dhe të gjithë kolegët e tij dhe miqtë u shtangën ky lajm tragjik me humbjen e një polici, atdhetari dhe profesionisti të çmuar të policisë së Kosovës dhe në veçanti policisë gjilanase dhe të asaj në Zhegër.

Qahil Halili bashkëvendës dhe veprimtar në fshatin Zhegër, e ka kujtuar me fjalë të mëdha Shyqeri Mahmutin, tashmë të ndjerë.

“I përhershëm do të jetë kujtimi për ty Shyqeri Mahmuti. Faleminderit për punën dhe përkushtimin që e ke bërë, në ruajtjen dhe sigurinë në Gryken e Karadakut dhe Kosovës. Zoti të Shpërbleftë me Xhenet. Ngushëllime familjes Mahmuti dhe të gjithë atyre që të njohën” ka shkruar Halili./rajonipress/