Një vepër e bukur poetike që sjellë ngrohtësi atdhetare dhe artistike

Gjilan – Në sallën e leximit të Bibliotekës për fëmijë “Fan.S.Noli”, në Gjilan, sot, para shumë familjarëve, miqve, artdashësve dhe krijuesve të ndryshëm, është bërë promovimi i veprës “Rrugë e Maratonit” nga Fetah Maliqi, autori nga Busavata.

Fillimisht, Diana Toska, moderatore e këtij manifestimi tha se, sot po përurohet vepra më e re e Fetah Maliqit, krijues nga diaspora, e cila vepër poetike do të jetë një rrugëtim për prurje të reja të autorit në fjalë.

Ramadan Mehmeti, editor i veprës tha se, Fetah Maliqi, me këtë libër të pestë me poezi e vazhdon rrugën e trasuar si në vëllimet e mëhershme poetike, por me një përkushtim më të madh dhe më të theksuar. “Vargjet e veprës “Rrugë e Marathonit” të Fetah Maliqit, flasin për një mishërim të thellë, për një shkrirje të veçantë të krijuesit me hallet, problemet, fatin, historinë dhe përpjekjet që i bën mbarë populli për t’u çliruar nga ankthet, nga dhuna dhe nga të gjitha të këqinjat e tij.

Andaj, popullin dhe historia e tij, e kanë frymëzuar poetin të harrojë vargje me tema e motive të ndryshme, përmes të cilave, kuptohet, shpërfaq botën shpirtërore dhe subjektive të tij. Këto janë mesazhe që i drejtohen njeriut, historisë, ngjarjeve dhe personaliteteve të shquara të historisë, kulturës dhe letërsisë shqiptare. Pra, bota e poetit është mjaft e bujshme imagjinative, ku vërehen njohuri të gjera dhe talenti krijues i tij. Poetit, Fetah i uroj suksese dhe prurje të reja në fushën e letërsisë”.

Sabit Rrustemi, poet gjilanas, tha se, shfrytëzoj rastin ta përgëzoj autorin dhe editorin e kësaj vepre poetike, e cila, si e tillë, ia vlen jo vetëm të lexohet, por edhe të vlerësohet. “Fetah Maliqi, hyn në radhën e atyre krijuesve që, letërsisë i qasen vonë dhe, duke i dhënë vepra të shpeshta, përpiqen për ta kompensuar kohën që iu ka iku pa e shkrirë mendjen në letrën e bardhë.

Pra, çuditërisht, kjo nguti në të shkruar dhe në publikimin e krijimtarisë, te Fetah Maliqi, nuk rritet vetëm në sasi, por edhe në cilësi. Ai shtoi edhe këtë se, “puna e tij e ngulmtë në shkrimin e poezisë e ka bërë të veten, mbase dhe stafi apo njerëzit që kanë pasur nëpër duar krijimet e tij, kanë ndikuar që ky poet, brenda një kohe të shkurtër, t’iu qaset e t’i vargëzojë njëra pas tjetrës, edhe poemat, të cilat i gjejmë dhe i kemi në librin më të rij të tij, “Rrugë e Maratonit”.

Prandaj, kjo vepër nis me emrin e të madhit Skënderbe, heroit tonë kombëtar dhe, përmbyllet me poemën për njërin nga intelektualët dhe veprimtarët tanë të rrallë, Xhavit Ahmetin, të cilin për dallim nga Gjergj Kastrioti –Skënderbeu, që e ka njohur nga historia, këtë të fundit e ka njohur, preku dhe takuar edhe për së gjalli, meqë edhe fizikisht nuk e ka pasur larg.

Po ashtu, “brenda këtyre dy figurave të shquara, të cilat, dihet, kanë jetuar e vepruar në një distancë kohore prej pesëqind e sa vitesh, S. Rrustemi tha se, në këtë poetizim, “shtjellohen poetikisht dhe përmes gjuhës poetike edhe heronjtë e shquar të kësaj pjese shqiptare, si: Adem Jashari, Idriz Seferi, Isa Boletini, Mulla Idriz Gjilani, Ibrahim Rugova, Agim Ramadani, Ramiz Cërnica, Hysern Tërpeza, Zija Shemsiu, Ismajl Maliqi e Sali Çeku”.

Ndërsa, Nexhat Rexha, studiues e kritik i letërsisë, në punimin e tij “Rrugëtimi përtej kohëve”, ai shtoi se, të tilla vepra, që përurohen në këto vend, edhe na bashkojnë. S’ka se si mos ta ketë këtë
mision vepra, e cila e përcjellë mesazhin e autorit. Edhe kësaj here, Fetah Maliqi na doli me një vepër të bukur poetike, e cila po na bashkon dhe po na relakson në këtë fushë të dijes. “Pra rrugëtimi i pandërprerë i jetës së njeriut krijon hapësirë për të zhvilluar rrugëtimet maratonike në artikulimin e ruajtjes dhe karakterit njerëzor.

Nexhat Rexha shtoi edhe këtë se, “libri i Fetah Maliqit, kur lexohet, të jep mundësinë e njohjes-rinjohjes për këto personalitete të dalluara kombëtare. Ata vijnë me të bëmat e tyre, të cilat bartin uniformën e kohës me të gjitha paragjykimet rastare, e të dhembshme që kanë krijuar rrethanat e kohës. Pra, me këto paraqitje artistike, Fetahu ka shkrirë luftën e pambarim të kombit tonë, ata kanë lidhur kohën me luftën, qëndresën e tyre dhe kështu kanë frymëzuar gjeneratat që kanë pasuar pas tyre.

Pyes: po kush nga ne nuk ka bashkëjetuar me veprën e Skënderbeut? Po të gjitha përkushtimet që u shkruan për heroin legjendar, Skënderbeun, frymëzimet e para i morën nga Marin Barleti e këndej, vepra e të cilit mbuloi Evropën me namin e tij, kurse emri dhe luftërat e tij rrezatuan idealin për liri.Andaj, si shtoi ai, “libri ka arritshmërinë artistike dhe historike në të gjitha poezitë e këtij vëllimi, sepse në tërësinë e saj poezia të afron frymën unifikuese.

Autori, Fetah Maliqi, në veprën e tij “Rruga e Maratonit” “ka ndriçuar edhe personalitete të çmueshme të kësaj treve, siç është personaliteti i kohës Ismail Maliqi, vdekja e t ij ishte fatkeqësi misterioze në komunikacion apo vdekja e Zija Shemsiut në burgun e Beogradit e ndonjë tjetër. Në fund të shtoj se, kjo vepër ka nivel të lakmueshëm artistik, sepse nëpër të gjitha përkushtimet lexuesi ndjen ngrohtësinë atdhetare dhe artistike”.

Në fund autori i veprës, Fetah Maliqi, shto se e kam vështirë pas këtyre fjalëve të flas. Ju sot më keni nderuar shumë. Ju faleminderit të gjithëve!/tefik selimi/rajonipress/