Rrudhani: Të gjithë jemi të bindur se do të fitojmë ndaj Rumanisë

Kombëtarja e Kosovës i ka vazhduar sot përgatitjet për dy ndeshjet e shtatorit, kundër Rumanisë dhe ndaj Qipros, të vlefshme për edicionin e ri të Ligës së Kombeve.

Donat Rrudhani i ka treguar përshtypjet e para nga ushtrimet me shokët e skuadrës, nën drejtimin e selektorit Franco Foda, shkruan “Gazeta Express”.

Futbollisti anësor ndihet i kënaqur me atmosferën dhe thotë se ai me shokë janë optimistë se do të dalin mirë nga sfida me Rumaninë, e cila do të zhvillohet të premten mbrëma në stadiumin “Fadil Vokrri” në Prishtinë.

“Atmosfera është shumë e mirë këtu gjithmonë, është krenari e madhe. Stërvitjet e para kanë shkuar mirë edhe pse unë dje nuk isha në stërvitje shkaku që luajta të dielën, por sot ka qenë një stërvitje e mirë intensive, angazhim shumë i madh nga gjithë lojtarët edhe kemi punuar shumë edhe taktikisht sot.”

“Besoj se mund të presim vetëm fitore, ne jemi të gjithë të bindur se do e fitojmë lojën me Rumaninë. Të gjithë do të luajmë të gjithë për tri pikë. E dimë se çka ka ndodh ndeshjen e fundit andaj e kemi edhe një motiv shtesë nga loja e fundit dhe shpresoj se vetëm do të fitojmë.”

“Faleminderit për mbështetjen gjithmonë si në humbje dhe në fitore janë gjithmonë këtu dhe kjo është edhe një krenari e madhe për ne, është shumë rëndësishme për neve mbështetja e dardanëve dhe e gjithë tifozëve.”

Kombëtarja e Kosovës e zhvilloi sot seancën e dytë stërvitore në kampin nacional në Hajvali. /Gazeta Express/