Mollët
Poezi nga Xhemë Karadaku
Gjyshi në bregore
U nis plot dëshirë,
Tek mollët verore
Në hije rri shtrirë.
Mollët po luhaten
Hej n’degë të larta
Gjyshit po i duken
Sikur kokrra t’arta.
Lëng i shkon goja,
Po nuk i arrin dot:
-Shporruni o gogla!
Nga smira u thotë.
Natyra gabim e ka
Ju la sikur sumbull.
S’ju bëri të mëdha
Ah, sa një kungull?
Një erë zemërake
Degët fort i tundi,
Gjyshit në rradake
Mollët ia shkundi!
E, koka iu gërvisht,
Po s’iu prish fytyra.
Dhe foli seriozisht:
-Mirë e ka natyra!