Ndërron jetë ikona e hendbollit gjilanas Sabahedin Sherifi

Gjilan – Gjilani ka mbetur edhe pa një ikonë të sportit dhe të familjeve të vjetra qytetare, pa Sabahedin Sherifin i cili ka ndërruar jetë në Glasgow të Skocisë.

Sabahedin Sherifi i cili rridhte nga një familje e vjetër qytetare në Gjilan nga familja e Mulla Sherifit, gjatë karrierës së tij la gjurmë të thella në jetën shoqërore e sportive të Komunës së Gjilanit.

Seba siç e quanin të gjithë ishte Ikonë e hendbollit Gjilanas, si 16 vjeçar kishte filluar karrierën e tij të ndritur të hendbollit dhe ai la gjurmë jo vetëm në hendbollin Gjilanas e Kosovar por edhe më gjerë.

Seba ishte njëri ndër shqiptarët e pakt që në vitin 1961 kishte luajtur ndeshje ndërkombëtare të hendbollit me Kombëtaren e Emirateve të Bashkuara Arabe.

Ish-hendbollisti Sherifi një kohë të gjatë ishte edhe trajner i Buzhurit aty ku edhe bëri karrierë si hendbollist, duke arritur suksese të mëdha në Ligat e ish-Jugosllavisë.

Sabahedin Sherifi ndërroi jetë në moshën 75 vjeçare, ndërsa varrimi do të bëhet në Glasgow të Skocisë./rajonipress/