Gjilani nuk arrin më tepër se një barazim

Në javën e 15-të, të Superligës së Kosovës në futboll, futbollistët e Gjilanit kanë bërë një hap mbrapa drejt titullit të kampionit vjeshtor, ata kanë barazuar me skuadrën e Drenicës nga Skenderaj me rezultat 1-1.

“Bardhëkuqet” e Gjilanit, vetëm në pjesën e parë kanë treguar futboll cilësor ndërsa në të dytën aksionet e tyre ishin të pakoordinuara, ndërsa mysafirët gjatë 90 minutave të vetmin gjysmë rast që e kishin e konkretizuan me gol.

Në fillim të kësaj përballje futbollistët e Gjilanit kanë rrezikuar seriozisht portën e Arion Ymerit në minutën e 10-të, Thaqi gjuan pranë portës.
2 minuta më vonë, Shabani gjuan me kokë por pranë shtyllës pingule.

Useini në minutën e 15, 18 e 24, gjuan furishëm por pranë portës së Ymerit të Drenicës.

Në minutën e 34-të, Hajdari tenton ta parabolon nga një pozitë e mirë portierin Ymeri, por dështon duke gjuajtur jashtë portës.

Tre minuta më vonë, Progni nga një pozitë e mirë për shënim gjuan por golin ja mohon portieri Ymeri.

Në minutën e 38-të, Gjilani fiton një penalti pasiqë një futbollist i Drenicës në tollovinë e krijuar kishte luajtur me dorë dhe arbitri i kësaj ndeshje Dardan Qaka tregon pikën e bardhë, nga pika e bardhë i pa gabuar ishte Fiton Hajdari i cili shënon për rezultatin 1-0.

Në pjesën e dytë skuadra e Gjilanit ishte e pa organizuar dhe e pa rrezikshme për portën mysafire, e këtë e shfrytëzojnë mysafirët në minutën e 72-të, pasi më herët portieri Kenan Haxhihamza boshatis portën e tij rreth 14 metra e këtë e shfrytëzon sulmuesi Harmon Gbowea i cili me kokë nuk e pati vështirë të barazon në 1-1.

Në minutën e 92 futbollisti i Drenicës Gbowea ndëshkohet me karton të kuq, pasiqë me kokë kishte goditur futbollistin e Gjilanit Franc Veliun.

Trajneri i Drenicës, Tahir Lushtaku pas ndeshjes deklaroi.
“Erdhëm për një pik dhe këtë e arritëm, Gjilani nuk tregoi diçka më tepër se ne, arbitri ja fali golin Gjilanit, skuadra e Gjilanit nëse dëshiron ta fitoj titullin duhet ndryshuar mentalitetin e lojës dhe të mos ketë presion”.

Trajneri i Gjilanit, Gentjan Mezani, i pakënaqur me humbjen e pikëve deklaroi.
“Është e pa pranueshme të humbim pikët pasiqë kishim lojën në dorë, ne sot i falëm dy pikë ndërsa në fund mund të jemi të kënaqur edhe me një pikë pasi që skuadra e Drenicës është një skuadër mjaft e vështirë”.

Në javën e 16-të, Gjilani do të jetë mysafirë i Ballkanit./rajonipress/