Gjimshiti largohet nga Atalanta: Pas 10 vitesh, kapiteni i jep fund aventurës në Bergamo, shkon te Al Diriyah

Pas 1 dekade, Berat Gjimshiti i ka dhënë lamtumirën Atalantës dhe do të vazhdojë karrierën e tij te Al Diriyah, në Saudi Pro League.

Kapiteni i Kombëtares shqiptare ka firmosur një kontratë dyvjeçare me skuadrën saudite, ndërsa bergamaskët kanë përfituar 3 milionë euro nga shitja e tij.

Mbrojtësi i kuqezinjve, te Atalanta, u shndërrua në një prej lojtarëve më të rëndësishëm të repartit defensiv.

“Erdha në Bergamo 10 vite më parë si një futbollist i ri, me një ëndërr dhe shumë dëshirë për të treguar vlerat e mia. Sot largohem duke e ditur se ky vend më dha më shumë se futbolli”, shkroi Gjimshiti në rrjetet sociale në mesazhin e lamtumirës për tifozët dhe klubin.

Me fanellën zikaltër, ai zhvilloi më shumë se 250 ndeshje në Serie A, duke qenë gjithashtu protagonist në kompeticionet evropiane.

Momenti më i rëndësishëm i kësaj periudhe ishte sezoni 2023-24, kur mbrojtësi kuqezi, me shiritin e kapitenit në krah, dhe Atalanta fituan Ligën e Europës, trofeun e parë të madh evropian në historinë e klubit.

Me transferimin te Al Diriyah, mbrojtësi shqiptar nis një kapitull të ri në karrierë, duke iu bashkuar klubit saudit në prag të sezonit të tij të parë në Saudi Pro League. Gjimshiti raportohet se do të përfitojë rreth 3 milionë euro në sezon nga kontrata e tij e re.