S’ka më trajnime kompjuterësh për mësimdhënës

Ministria e Arsimit, Shkencës dhe e Teknologjisë e Kosovës (MASHT) që nga viti 2009 ka filluar me realizimin e trajnimit të personelit arsimor për programin e ECDL-së (përdorim të kompjuterit). Por, sivjet ky kurs ECDL (Patenta Evropiane për Përdorimin e Kompjuterit) për mësimdhënës nuk është zbatuar. Rrahman Jasharaj, kryetar i SBASHK-ut, ka thënë për gazetën se programi ECDL nuk po vazhdon.

“Trajnime për ECDL nuk ka pasur sivjet. Është konsideruar se nuk ka mjete…”. Jasharaj ka thënë se do të ketë trajnime për mësimdhënës, por Këshilli Shtetëror i Licencimit, ku SBASHK-u është anëtar, sipas tij, ka deklaruar se duhet të bëhet një analizë që të shihet se cilat trajnime janë të nevojshme për mësimdhënësit dhe kush është i autorizuar si dhe profesional t’i mbajë ato.

Ai thotë se në fillim do të shkohet me trajnime të shkallës së parë, që janë trajnime profesionale, dhe shkallës së dytë që janë përgatitje tjera ku parashihet të hyjë dhe trajnimi ECDL. Drejtori për Arsim në Komunën e Malishevës, Blerim Thaçi, ka thënë se aq sa ka informacion ky kurs është ndërprerë. Thaçi thotë se ky kurs duhet të vazhdojë./zeri/