Në Kamenicë diskutohet për transportin publik falas, Rahimaj thotë se është mjaft e mirëpritur

Kamenicë – Kryetari i Komunës së Kamenicës, Kadri Rahimaj, ka marrë pjesë në tryezën e rrumbullakët për lansimin e raportit lidhur me iniciativën e transportit publik falas në Komunën e Kamenicës.

Kjo tryezë e cila u organizua nga fondacionin ‘Friedrich Ebert Stiftung’ kishte për qëllim që të shfaq rezultatet e transportit publik falas i cili ishte i organizuar për Komunën e Kamenicës rreth një muaj.

I pari i komunës duke falënderuar fondacionin FES për iniciativën që kishin marr në Kamenicë për transport falas, theksoi se një nga nevojat më të mëdha të qytetarëve është edhe transporti falas, e që sipas tij kjo gjë ka qenë mjaft e mirëpritur nga kamenicasit.

Ndër të tjera Rahimaj theksoi se një gjë e tillë i shërben komunitetit për të kryer më lehtë punët e tyre të përditshme e poashtu redukton edhe përdorimin e veturave të shumta gjë kjo e cila siç theksoi ai ruan ambientin e gjelbër.

Në këtë tryezë të pranishëm ishin edhe përfaqësues nga FES si Rudina Nallbani Hoxha-menaxhere e programeve, Ramadan Duraku nga Departamenti i Trafikut dhe Transportit në Fakultetin e Inxhinierisë, Diana Vllasaliu nga IDRA e cila paraqiti rezultatet e hulumtimit dhe gjetjet mbi efektivitetin e transportit falas për qytetarët.

Ajo tha se rekomandimet kryesore nga ky hulumtim janë:
Përmirësimi i linjave të autobusëve, fushatë ndërgjegjësuese për transport falas, përmirësimi i qasjes, krijimi i hapësirave për persona me ç`asje të kufizuar, shfrytëzimi subvencioneve në dispozicion./rajonipress/