Mirë jemi

Hashim Thaçi i është përgjigjur negativisht dëshirës së zyrtarëve të AAK’së për t’u bërë pjesë e një koalicioni të ri. Ai ka thënë se koalicioni qeverisës mund të ndryshojë vetëm pas zgjedhjeve të rregullta parlamentare.

Por, kreu i Qeverisë ka mirëpritur gatishmërinë e partisë së Ramush Haradinajt për të marrë pjesë në dialogun me Serbinë. Kundër një koalicioni të ri është shprehur edhe Kryeparlamentari Jakup Krasniqi.

Kryeministri Hashim Thaçi, i cili është edhe kryetar i Partisë Demokratike të Kosovës, u është përgjigjur negativisht deklaratave të udhëheqësve të AAK’së për një koalicion të ri qeveritar.

Thaçi ka deklaruar se nuk e ka ndërmend të hyjë në koalicion me asnjë parti opozitare e as me AAK’në, e cila ka shprehur gatishmëri për t’u bërë pjesë e një ekzekutivi të ri në vend.

Pavarësisht kësaj, Thaçi ka thënë se ndryshimi i koalicionit do të ndodhë vetëm me zgjedhje të reja në afatin kushtetues, më 2014.

“Koalicioni aktual është funksional dhe mirëqeverisës, në të njëjtën kohë nuk do të ketë zgjedhje të parakohshme, zgjedhjet do të jenë të rregullta në afatin kushtetues. Por, ka hapësirë dhe mundësi për gjithkënd për të kontribuar në konsolidimin dhe forcimin e shtetit”, ka thënë Kryeministri për Zërin e Amerikës.

“Ndryshimet politike ndodhin vetëm kur ndodhin zgjedhjet e reja elektorale”, ka shtuar ai.

Zyrtarët e AAK’së kanë deklaruar në muajin e fundit se do të marrin pjesë në bisedimet e ardhshme politike me Serbinë, duke shprehur gatishmërinë të bëhen jenë pjesë e Qeverisë.

I pari që nuk kishte mohuar një koalicion të tillë ka qenë Ardian Gjini e më pas udhëheqësi aktual i AAK’së, Blerim Shala, i cili shprehur hapur pro koalicionit me PDK’në me kushtin që Ramush Haradinaj të merr postin e Kryeministrit.

Kundër një koalicioni mes Thaçit e Haradinajt ka dalë të enjten edhe Sekretari i përgjithshëm i PDK’së, Jakup Krasniqi.

Ai ka thënë se nuk e sheh të nevojshme ndryshimin e koalicionit për të shkuar në bisedime me Serbinë.

“Unë mendoj që nuk ka ndonjë arsye që për çështje të bisedimeve të bëhen koalicionet. Për këtë çështje as që është biseduar në organet e partisë”, ka thënë Krasniqi për Radio Dukagjinin.

Por, më herët Krasniqi kishte thënë se jo vetëm AAK, por edhe partitë tjera duhet të bëhen bashkë në koalicionin për të shkuar pastaj në bisedime me Serbinë.

Thaci ndërkaq ka folur pozitivisht për gatishmërinë e opozitës konkretisht AAK’së për t’iu bashkuar procesit të bisedimeve me Serbinë.

Ai ka thënë se e mirëpret gatishmërinë e një pjesë të opozitës për të marrë hise në dialogun e ardhshëm do të zhvillohet me Serbinë.

“Unë përshëndes edhe zërat opozitarë në mbështetje të një procesi dhe dialogu politik për normalizimin e marrëdhënieve ndërshtetërore mes shtetit të Kosovës dhe Serbisë”, ka thënë ai.

Duke mos i përmendur emrat e partive, Thaci ka thënë se në dialogun e ardhshëm të gjithë duhet të marrin përgjegjësinë.

“Mendoj që kjo është përgjegjësi e përbashkët, nuk është përgjegjësi vetëm e një partie apo një mandati qeverisës. Sa më herët që të përmbyllet çështja e normalizimit të marrëdhënieve mes shtetit të Kosovës dhe Serbisë, kjo do të jetë në të mirën e të gjithë qytetarëve të Kosovës, të shtetit të Kosovës, e partive politike, e shoqërisë civile, e mediave, do të jetë në favor të perspektivës europiane të Republikës së Kosovës. Të gjithë do të lirohemi nga një barrë që duhet ta përmbyllim herët apo vonë”.

Ai ka thënë se pozita dhe opozita duhet të jenë bashkë edhe në dialogun politik, sikur ka ndodhur në Rambouillet e Vjenë, ku pastaj është shpallur pavarësia e Kosovës.

Ndryshe, gjatë ditës edhe AKR’ja e Behgjet Pacollit ka dal me qëndrim se nuk e ka në plan të largohet nga Qeveria, edhe nëse PDK hyn në koalicion me AAK’në.

“Qeveria e Kosovës, pavarësisht zërave të cilët nuk zgjedhin mjete dhe as metoda për ardhjen në pushtet, është duke funksionuar në realizimin e suksesshëm të planit dhe programit qeverisës. AKR gjithashtu sqaron opinionin se si subjekt politik me orientime liberale, asnjëherë nuk ka pasur vija të kuqe bashkëpunimi me asnjë prej subjekteve politike në Kosovë, që synim e kanë angazhimin për zhvillimin politik dhe ekonomik të vendit”, është thënë në sqarimin e AKR’së.(express)

Shpërndaje.
© RAJONIPRESS

Vërejtje!

RajoniPress.com nuk do të botojë shkrime që nuk i përmbushin kriteret dhe standardet profesionale të gazetarisë bashkëkohore. Nuk do të ketë për askënd mbyllje apo censurë, por jemi të fokusuar që në këtë agjenci, lajmi, shkrimi, raporti, intervista dhe opinioni të plotësojnë kriteret profesionale. Gjithashtu opinionet, analizat, komentet, nuk duhet të shkelin parimet etike (gjuhën e urrejtjes, fyerjet, diskriminimet e çfarëdoshme).