Malisheva përkujton vrasjet e Adem Salihut dhe Naser Nezirit

Gjilan – Sot bashkë me familjet e dëshmorëve, përfaqësues të institucioneve dhe banorë të Malishevës përkujtuam 26 vjetorin e vrasjes së Adem Salihut dhe Naser Nezirit, të cilët u vranë nga paramilitarët serbë më datën 16 prill të vitit 1999 ka shkruar Riad Rashiti.

Postimi i plotë:

Të nesërmen më 17 prill është vrarë edhe Muhamet Ibrahimi, ndërsa më 18 prill u vranë edhe dy pleq të fshatit axha Hasan Mustafa 77 vjeçar dhe Avdi Mustafa në moshën 69 vjeçare.

Në të njëjtin ditë, paramilitarët serbë gjithashtu dëbuan të gjithë banorët e fshatit duke përdorur dhunë, plaçkitje, djegie dhe vrasje të të rinjëve, pleqve dhe njerëzve të tjerë të pafajshëm.

Është e rëndësishme që t`i kujtojmë gjithmonë dhe të respektojmë të gjithë martirët, dëshmorët dhe heronjët tanë, që dhanë gjakun e tyre për lirinë dhe shtetin e Kosovës.

Ky gjak përbën krenarinë tonë, krenarin e familjeve Salihu, Ibrahimi dhe Mustafa, ata janë themeli i Kosovës së lirë e të pavarur. Secili nga ne tani e kemi obligim për ndërtimin dhe forcimin e institucioneve të shtetit tonë.

Do t’i kujtojmë gjithmonë ata që ranë heroikisht për atdheun tonë.
Lavdi !