Mungesa e projekteve serioze, Gjilanin e bënë një qytet të harruar e lënë pas dore nga Qeveria

Gjilan – Në Gjilan nuk ka ndonjë projekt serioz, që është realizuar ose pritet të realizohet në këto katër vitet e fundit. Demagogjia e Albin Kurtit dhe Alban Hyenit, Gjilanit i kanë sjellur vetëm fraza të thata filozofike, duke e renditur këtë qytet ndër të fundit, për kah zhvillimi në infrastrukturë e sektor tjerë.

Mjafton ta shohësh rrugën e Prishtinës, e cila është mbetur shkretë dhe në gjendje mjeruese nga Qeveria Kurti dhe të bindesh se Gjilani asnjëherë s`ka qen prioritet i Qeverisë qendrore dhe jo vetëm kjo ishte rruga e Kllokotit që i dha shije të keqe, pritjes së qytetarëve se Kurti dhe eskorta e tij e filozofëve, për të treguar storie e përralla do të bënte mrekulli në Anamoravë.

Bajrami një qytetar nga Vitia i cili frekuenton çdo ditë rrugën Viti – Kllokot – Gjilan thotë se kjo rrugë është asfaltuar tri katër here.
“Vërtet është një keqpërdorim flagrant i parasë publike, një mungesë totale e njohjes së problemeve profesionale të kësaj lamie. Ne Vitia kemi vuajtur shumë sepse kishte pluhur e gropa kudo” tha Bajrami.

Ndërsa, Menderesi një vozitës gjilanas tha se hyrja e Gjilanit nga Prishtina, është për mjerim dhe gjynah.
“Unë nuk e di kush i ka fajet, por një e kuptoj se po vuajmë shumë, edhe po i shkatërrojmë veturat edhe po thithim pluhur çdo ditë. Kurti kurrë se ka pasur prioritet jo se jo, po as sipërfaqësisht s`është interesuar, e kujdesur për Anamoravën. Paramendojeni për një urë në Badovc, na u desh të presim dy vite e më shumë” tha i irrituar Menderesi./rajonipress/