Lojtari i Vitit 2024 në Shqipëri shpallet Berat Gjimshiti

Berat Gjimshiti është shpallur lojtari i vitit te Kombëtarja e Shqipërisë në futboll.

Në ceremoninë e organizuar nga Federata Shqiptare e futbollit të hënën mbrëma, mbrojtësit të Atalantas i takoi çmimi “Lojtari i Vitit i Kombëtares”.

Përzgjedhja e lojtarit më të mirë të kombëtares u bë nga votat e lojtarëve të Shqipërisë. Çmimin e pranoi nëna e kapitenit Gjimshiti nga selektori Sylvinho.

Ndërkohë Ylber Ramadanit i ka takuar çmimi “Zemër Kuq e Zi”. Ky çmim i është ndarë mesfushorit të Lecces, Ramadanit, nga stafi teknik i Kombëtares së Shqipërisë për pasionin e madh për fanellën kuqezi dhe përkushtimin maksimal në çdo ndeshje.

Çmimi për futbollistin më të mirë të vitit 2024 në kampionatin shqiptar i ka takuar sulmuesit të Vllaznisë, Bekim Balaj.

Balaj e fitoi çmimin “Topi i Artë” pas një gare të fortë me Arinaldo Rrapajn, Albano Aleksin dhe Ermir Rashicën.