Ish-trajneri i tij ka marrë drejtimin e skuadrës turke, Arbër Hoxha drejt transferimit në Turqi

Arbër Hoxha mund të transferohet te Kayserispor gjatë merkatos së verës. Klubi turk është duke shqyrtuar seriozisht mundësinë për ta afruar anësorin shqiptar në radhët e veta.

Interesimi buron nga trajneri aktual i Kayserisporit, Sergej Jakirovic, i cili e njeh mirë Hoxhën. Dyshja ka punuar së bashku te Dinamo Zagreb, ku trajneri kroat pati një ndikim të madh në zhvillimin e tij.

Jakirovic ka mbetur i impresionuar nga aftësitë e Hoxhës dhe dëshiron ta ketë nën urdhra të tij edhe në Turqi. Ai e sheh lojtarin si pjesë kyçe në ndërtimin e një skuadre më konkurruese për sezonin e ardhshëm.

Marrëdhënia e mirë mes tyre dhe njohja e mëparshme e bën këtë transferim mjaft realist. Hoxha tashmë është një emër i njohur për Jakirovicin, që e konsideron atë të gatshëm për një hap tjetër në karrierë.

Sipas ‘Transfermarkt’, vlera e Hoxhës në treg është rreth 1.5 milionë euro. Një shifër e arsyeshme për Kayserisporin, që po kërkon përforcime cilësore pa kosto të lartë.

Për momentin, bisedimet janë në fazë paraprake, por nëse palët arrijnë marrëveshje, Hoxha pritet të ribashkohet me ish-trajnerin e tij në Turqi, në një projekt të ri te Kayserispor. /Telegrafi/