Duka e këshillon FFK-në “të mos i fusë brirët” me FIFA-n

Presidenti i Federatës Shqiptare të Futbollit (FSHF), Armando Duka, ka këshilluar krerët e Federatës së Futbollit të Kosovës (FFK) të mos nxitojnë për të çuar FIFA-n në Gjykatën e Arbitrazhit Sportiv (CAS), me seli në Lousanne, pasi kjo, sipas tij, nuk do të sillte ndonjë rezultat në favor të Kosovës.

Ai të martën ishte në Prishtinë, ku mori pjesë në ceremoninë e shpalljes së laureatëve të FFK-së për vitin 2012 dhe tha se këtë porosi ua ka dhënë edhe zyrtarëve kosovarë, shkruan koha.

“Nëse kërkoni një mendim timin personal, unë gjithmonë tentoj t’i zgjidh gjërat me konsensus, me marrëveshje dhe me negociata, me lobim dhe jo me konflikt”, ka thënë Duka.