Dobërçani nuk e harron traditën, në mënyrë dinjitoze festoj ditën e Pavarësisë

Gjilan – Ditëlindja e 10-të e Pavarësisë së Republikës së Kosovës, u festua në mënyrë madhështore në Dobërçan, falë angazhimit të përbashkët të komunitetit, shkollës dhe shoqatës 17shkurti.ch, duke organizuar aktivitete të ndryshme për ta shënuar këtë datë historike.

Festa e Pavarësisë filloi me nderimin e Dëshmorëve të fshatit, për të cilët Këshilli Organizues vendosi kurorë me lule pranë lapidarit në parkun që mbanë emrin e Dëshmorëve të Dobërçanit, Mulla Nysret F. Hajdari dhe Mehmedali Sh. Behluli, për të vazhduar festën me programin e përgatitur nga nxënësit dhe arsimtarët e shkollës së Dobërçanit, grupi folklorik me këngëtarin Ilir Rexhepi, si dhe nxënësit e shkollës “Xhelal Sopi” nga Petriti, të cilët e begatuan programin e festës së Pavarësisë.

Në emër të Këshillit Organizues, të pranishmit i përshëndeti z. Ibish Ibishi, ndërsa një historik të shkurtër “Kontributi i Dobërçanit për Pavarësinë e Kosovës”, e paraqiti historiani Rexhep Arifi.

Poashtu, u nda mirënjohje ‘’Post mortum’’ për ish-veprimtarin e çështjes kombëtare dhe aktivistin e palodhshëm “Jonuz Aliu” të cilën në emër të Këshillit Organizues e ndau Ekrem Kryeziu. Mirënjohje u nda edhe për aktivistin Agron Murseli.

Organizimi i sotëm në Dobërçan, dëshmoi se ky vend gjithmonë ka pasur njerëz të cilët për interesin e përgjithshëm të fshatit, i lënë mënjanë dallimet partiake e politike, për të dhënë kontributin e nevojshëm në çdo aspekt.

Pjesë e Këshillit Organizues ishin: Naser Arifi, Ibish Ibishi, Ekrem Kryeziu, Rexhep Arifi, Agron Murseli dhe Sadat Salihu, të cilët shprehën falënderim të thellë për të gjithë ata të cilët me kontributin dhe praninë e tyre e nderuan programin dhe punën tonë dhe e bën më madhështore Ditën e Pavarësisë së Kosovës.

Lavdi Dëshmorëve të Dobërçanit dhe gjithë Dëshmorëve të trojeve shqiptare të cilët dhanë jetën për lirinë dhe Pavarësinë e Kosovës.
Dobërçan, Me respekt: Më: 17 shkurt 2018 Këshilli Organizues.