“Çlirimët” dhe “Çlirimtaret” e Kosovës

Muaji qershor do të mbetet përjetë në kujtesën e shqiptarëve. 20 vjet më parë, më datën 9 të këtij muaji, u nënshkrua Marrëveshja e Kumanovës, e cila i dha fund gjenocidit dhe agresionit serb në Kosovë. Tri ditë pas, më 12 qershor, zbarkuan rreth 50 mijë trupa paqeruajtëse të NATO-s, me ç’rast u kurorëzua përfundimisht çlirimi i Kosovës. Sot, dy dekada pas këtij momenti historik, Kosova ka mbi 1500 djem me emrin Çlirim dhe mbi 120 vajza të pagëzuara “Çlirimtare”, shkruan sot gazeta “Zëri”.

Nëntë vjet para se të çlirohej Kosova ishte pagëzuar me emrin Çlirim. Lirinë e munguar familja Berisha sikur donte ta gjente në emrin e fëmijës së tyre, Çlirimit. 27-vjeçari nga Prishtina ndihet tejet krenar që e mban emrin i cili simbolizon antonimin e robërisë. Meqë kishte lindur shtatë vjet para se Kosova të çlirohej nga okupatori serb, dy dekada pas Çlirim Berisha kujton mjaft mirë ditën kur erdhi lajmi i stërpritur, që shënoi fundin e Serbisë në Kosovë.

Fundin e vrasjeve, të masakrave e të maltretimeve të shqiptarëve nga forcat paramilitare serbe.

“Ditën kur ndodhi çlirimi i Kosovës e gjitha familja patëm dalë për t’i pritur trupat e KFOR-it, të cilët kalonin rrugëve të Prishtinës”, rrëfen ai, teksa sjell në kujtesë çastet kur ushtarët e KFOR-it i kishin rrekur në krah fëmijët shqiptarë dhe u kishin shpërndarë dhurata. Jo vetëm për Çlirimin e familjen e tij, por për të gjithë shqiptarët fillimqershori i vitit 1999 kishte sjellë lot gëzimi – për fundin e gjenocidit dhe lot dhimbjeje – për familjarët e miqtë e humbur, gjaku i të cilëve solli Ditën e Çlirimit.

Shpërndaje.
© RAJONIPRESS

Vërejtje!

RajoniPress.com nuk do të botojë shkrime që nuk i përmbushin kriteret dhe standardet profesionale të gazetarisë bashkëkohore. Nuk do të ketë për askënd mbyllje apo censurë, por jemi të fokusuar që në këtë agjenci, lajmi, shkrimi, raporti, intervista dhe opinioni të plotësojnë kriteret profesionale. Gjithashtu opinionet, analizat, komentet, nuk duhet të shkelin parimet etike (gjuhën e urrejtjes, fyerjet, diskriminimet e çfarëdoshme).