Meriton Salihu: Jam shumë i lumtur që fituam turneun e Komandantit legjendar “Adem Jashari”

Në turneun në kujtim të Komandantit legjendar të UÇK-së, “Adem Jashari”, i cili mbahet për herë të 13-të në fillim të muajit mars, nën organizimin e FFK-së, dhe në kuadër të manifestimeve “Jetojmë për Lavdinë Tuaj”, Kombëtarja e Kosovës në futsall ka mposhtur Shqipërinë me rezultat 6-3.

Edhe pse ishte reviale e vëllazërore të dy kombëtaret treguan angazhim dhe lojë të pëlqyer, por kësaj radhe “Dardanët” e Kosovës treguan lojë më të mirë dhe interesante.

Përshtypje të madhe për këtë triumf të Kombëtares së Kosovës, ka bërë njëri ndër futbollistët më të mirë të “Dardanëve”, Meriton Salihu, i cili me mjaft emocione është paraqitur në këtë përballje.

“Jam shumë krenar dhe i priviligjuar që me anë të futbollit kam nderuar legjendën e kombit tim “Adem Jashari”. Të nderosh një legjendë që me tërë familjen e tij u flijua për lirinë e popullit të Kosovës është diçka ikonike dhe e paharruar, do ta mbaj gjatë në mend këtë turne të lavdisë së popullit Kosovar. Ishte shumë emocionuese edhe prezenca e nipit të legjendës Adem Jashari, Hamëz Jashari, i cili është vazhdimësi e kësaj familje patriotike e popullit të Kosovës”, ka bërë të ditur i emocionuar futbollisti Meriton Salihu, i cili me mjaft sukses karrierën e tij në futsall është duke e zhvilluar në shtetin helvetik në Zvicër. Kombëtarja e Kosovës në futsall garat paraeliminatore për Kupën së Botës i zhvillon në fillim të muajit prill në Bullgari, ku do të ballafaqohet në Grupin C me Skocinë, Armeninë e Bullgarinë./rajonipress/