Drejtoria për Kulturë, Rini dhe Sport e Komunës së Gjilanit, subvencionon 33 organizata sportive

Gjilan – Drejtoresha e Drejtorisë për Kulturë, Rini dhe Sport, e Komunës së Gjilanit, Deniza Limani, sot në një konferencë për shtyp ka gëzuar me lajmin e kumtuar se 33 organizata sportive do të subvencionohen gjerë në fund të vitit 2020.

Drejtoresha Limani ka bërë të ditur se 33 organizata, në mesin e tyre shumë klube sportive do t’ju ndahet një shumë prej 59,000 Euro.

“Ne si Komunë kemi paraparë 100 000 Euro t`i ndajmë për Sport, Rini e Kulturë, por duke e parë nevojën e shumë organizatave kryetari i Komunës Lutfi Haziri, ka rritë këtë shumë në 124,000 Euro, çka jemi shumë falënderues dhe në vitin e ardhshëm kjo shumë do të jetë edhe më e madhe, ndërsa kësaj radhe vetëm për Sport kemi ndarë 59 000 Euro, ndërsa shuma tjetër do jetë për Kulturë e Rini”.

Limani ka theksuar se nga një numër i madh i aplikimeve, komisioni ka vendosur 72 organizatave t’ju ndahen mjetet nga komuna prej 124 000 Euro, ndërsa sot kanë nënshkruar kontratat të gjithë ata që janë subvencionuar.

Drejtoresha e Drejtorisë për Kulturë, Rini dhe Sport, Deniza Limani, ka theksuar se Komuna e Gjilanit do të jetë gjithmonë pranë çdo kërkese të çdo organizate të Kulturës, Rinis dhe Sportit, me qëllim të avancimit për të mirën e qytetarit të Gjilanit./rajonipress/