Katër vjet më parë Shqipëria e bëri ëndrrën realitet
RajoniPress
15:36, 11 Qershor, 2020
Në këtë ditë katër vjet më parë Kombëtarja e Shqipërisë debutoi në kampionatin evropian “Euro 2016”.
Për here të parë në histori djelmoshat e drejtuar asokohe nga Gianni De Biasi realizuan ëndrrën shekullore të shqiptarëve për t’u kualifikuar në një kompeticion të tillë, raporton “Zeri.info”.
Ndeshjen e parë Shqipëria e zhvilloi në Lens, në stadiumin “Stade Bollaert-Delelis”, ku përballë vetes kishte Përfaqësuesen e Zvicrës.
Aso kohe Zvicra në formacion kishte pesë shqiptarët: Granit Xhaka, Valon Behrami, Xherdan Shaqiri, Admir Mehmedi dhe Blerim Xhemajli.
Special ishte fakti se dy vëllezërit Granit dhe Taulant Xhaka ishin kundërshtarë në këtë sfidë, ku njëri luante për Zvicrën, e tjetri për Shqipërinë.
Për më shumë se 50 minuta, Kombëtarja shqiptare luajti me dhjetë lojtarë pasi kapiteni legjendar Lorik Cana u ndëshkua me karton të kuq.
Në mbrëmjen e 11 qershorit 2016, kulla “Eiffel” u vesh e gjitha kuq e zi.
Image
Ndonëse dhuroi emocione me futboll të bukur, Kombëtarja e Shqipërisë nuk arriti të kalojë fazën e grupeve, por që bëri krenarë gjithë shqiptarët kudo në botë. /Zeri.info
