Kush është Naser Ajeti, anëtari i ri i Komitetit Ekzekutiv në FFK?

Gjilan – Siç dihet për katër vitet e ardhshme futbollin e Anamoravës në Komitetin Ekzekutiv në FFK do ta përfaqëson Naser Ajeti, i cili një jetë të tërë i’a ka kushtuar futbollit dhe në përgjithësi sportit.

Naser Ajeti i përket një gjenerate të artë të futbollit jo vetëm të futbollit Gjilanas por edhe ati Kosovar.

Që nga mosha 10 vjeçare Ajeti u dashurua në lojën e futbollit, ndërsa talentin që kishte në lojën “magjike” të futbollit vjen në shprehje si 17 vjeçar kur ishte futbollist standard në klubin e C.Zvezdës.

Ajeti dëshmoi pjekuri të lart të futbollit si në lojën e saj njashtu edhe në kulturën sportive të cilën e posedonte, ai përpos që kishte një respekt të jashtëzakonshëm tek bashkëlojtarët, ai fitoj edhe një simpati të madhe edhe tek skuadrat kundërshtare me kulturën që posedonte.

Naser Ajeti-Kaceli, karrierën e vazhdon në KF Drita por talenti i tij nuk mbetet pa u vërejtur, ai më pas kalon tek skuadra Mërgimi nga Maqedonia e Veriut, duke treguar lojëra cilësore.

Ajeti i bashkohet Gjilanit në kohërat më të vështira të futbollit të Kosovës, atëherë kur gjithçka ishte rrënuar nga pushtuesit Serb dhe kur ata ishin duke i larguar futbollistët nga fushat e blerta, për ti detyruar që ndeshjet e tyre t`i zhvillojnë në ledinat anembanë Kosovës.

Ish-mesfushori Ajeti në vitin 1995, me shumë shok të tij arrijnë të formojnë skuadrën e KF Gjilani’95, duke i treguar pushtetit Serb se ky vend ka njerëz që nuk i dorëzohen pushtuesit Serb.

Naser Ajeti kishte një vizion jo vetëm në lojën e futbollit, por në të gjitha sportet, Ajeti ishte një personazh i cili me të madhe i ndihmoi FHK-së për anëtarësimin në Asociacionet Evropiane e Botërore.

Ajeti i cili fliste katër gjuhë evropiane kishte pasur shumë takime, siç ishte takimi me Kryetarin e federatës botërore të Hendbollit, Hasan Mustaa dhe me shumë kryetar të tjerë të federatave Evropiane.

Për ish-futbollistin Ajeti shumë kryetar të federatave të hendbollit Evropian kishin respekt për punën që po bënte, saqë në shumë raste edhe kryetari i federatës së Turqisë kishte kërkuar që Ajeti të jetë delegatë nga Kosova në federatën e Hendbollit Evropian, por Ajeti një gjë të tillë e kishte refuzuar për dashurinë që kishte ndaj futbollit.

Një dashuri të tillë ndaj futbollit, Ajeti e kishte edhe kur humbi vëllaun e tij, Jeton Ajetin në vitin 1997, pas pesë ditësh ngushëllime në familjen e tij, Naser Ajeti veshë këpucët sportive për tu ndihmuar shokëve të KF Gjilanit për të dhënë kontributin e tij në fitoren e asaj ndeshje historike për Ajetin pasiqë kishte ndërruar jetë vëllai i tij, Jetoni i cili ishte një njeri i respektuar në qytetin e Gjilanit.

Naser Ajeti tani 49 vjeçar, në kohën e fundit ka qenë në stafin e ngushtë në SC Gjilan, dhe i cili me punën e tij ka dëshmuar se është një menaxher i mirë duke pasur rezultate të kënaqshme.

Anëtari i ri i Komitetit Ekzekutiv për Anamoravë në FFK, Naser Ajeti, ka theksuar se në pozitën e tij të re do të jetë një zë shumë i fuqishëm për të mirën e futbollit.
“Së pari i falënderohem kryetarit të SC Gjilanit, Florim Zukës, i cili ka besim në punën time dhe i cili është duke bërë një punë kolosale, i falënderoj të gjithë delegatët ata të cilët më votuan, por edhe ata të cilët nuk më votuan, duhet pranuar edhe humbjen poashtu edhe fitoren në mënyrë demokratike. Për katër vitet e ardhshme do të jem afër çdo klubi të Anamoravës për t`i përfaqësuar interesat e tyre në FFK, do të jem zë i fuqishëm në federatën e futbollit për të mirën e futbollit dhe bashkërisht do t`i japim hijeshi futbollit jo vetëm të Anamoravës, por edhe atij kosovar”, ka bërë të ditur, Naser Ajeti./rajonipress/