Mustafa: Gjithmonë mirënjohës NATO-s dhe SHBA-së

Kryetari i Lidhjes Demokratike të Kosovës Isa Mustafa ka shkruar në Facebook se para 20 viteve ishte dita e përcaktimit të fatit të Kosovës.

Mustafa, përmes një postimi në Facebook, ka thnë se 24 marsi është ditë e reflektimit të vlerave demokratike e humanitare të shteteve të Perëndimit të udhëhequra nga SHBA-të.

Postimi i Mustafës:

“Intervenimi i Aleancës Veriatlantike ndaj caqeve ushtarake serbe, para 20 viteve, ishte dita e përcaktimit të fatit tonë. Kjo është ditë e reflektimit të vlerave demokratike e humanitare të shteteve të Perëndimit, të udhëhequra fuqishëm nga Shtetet e Bashkuara të Amerikës.

Ndërhyrja e NATO-s, krahas rezistencës paqësore të ideuar dhe të drejtuar nga Presidenti Historik, Ibrahim Rugova dhe luftës heroike të UÇK-së, hapi horizontin e lirisë në Kosovë. Në vatrat e tyre të djegura e të shkatërruara u kthyen mbi një milion njerëz që ishin deportuar nga ushtria dhe forcat paramilitare serbe. NATO dhe vlerat perëndimore janë dhe mbeten besim dhe synim i yni i palëkundur.

Gjithëherë do u jemi mirënjohës!”, ka shkruar Mustafa. /Telegrafi/