Ulja e parimeve dhe “ndryshimi” i Kurtit!

Lideri i Lëvizjes Vetëvendosje, Albin Kurti, nuk po duket aq kritik ndaj skenës politike kosovare ashtu siç jemi mësuar ta shohim që nga themelimi i Vetëvendosjes, përjashtuar këtu vetëm PDK-në, me të cilin është deklaruar se nuk e lidh asgjë. Lëvizja e Kurtit një kohë, pos PDK-së, nuk ka kursyer edhe partitë tjera si LDK-në e AAK-në, madje këtë të fundit e kishte quajtur edhe parti të haraçit.

Më 26 dhjetor 2013, ai në Televizionin Publik të Kosovës, ka thënë se shumë militantë të AAK-së kanë qenë të inkuadruar në marrjen e haraçit në Dukagjin dhe është quajtur edhe parti e haraçit. “Ne i kemi thënë nja 2-3 herë, ata vetë e përsëritën 20-30 herë mandej. Por, le të mos viktimizohen ata.

Nuk është problemi që tash AAK-ja e paska humbur qeverisjen në disa komuna në Dukagjin. Problemi është që biznese të shumta janë detyruar të paguajnë haraç. Ky është problemi. Viktima e vërtetë nuk është AAK-ja. Viktima janë ato biznese dhe Lëvizja Vetëvendosje e ka shumë të qartë, se është njëlloj sekreti publik në Dukagjin, se është mbledhur haraçi atje…( Tribuna).