Xhelili: Ku qëndron problemi i ngulfatjes së biznesit gjilanas?

Gjilan – Selver Xhelili thotë se Gjilani, dikur, një nga shtyllat kryesore të zhvillimit të biznesit, jo vetëm për rajonin e Anamoravës, por edhe më gjerë në nivel të republikës, tashti po përballet me një gjendje të mjerueshme, ku për ditë e më shumë kemi kompani, të cilat po falimentojnë, e njerëz më pak të fuqishëm në sferën e biznesit. Shifrat e faktet flasin se Gjilani, jo më larg se para 10 vjetësh, përmendej për të mirë në jetën e biznesit, me një ambient të volitshëm për investime dhe me një renditje në rang – listën e komunave nga më të suksesshmet. Kurse sot, Gjilani, mjerisht frymon me një biznes të ngulfatur, të sëmurë dhe falimentues, duke u renditur të parafundit prapa Ferizajit, Prizrenit, Pejës, Mitrovicës etj.

“Ku qëndron problemi i kësaj politike, që shkatërron bizneset gjigante të Gjilanit? Problemi nuk qëndron në atë se Ferizaji, Prizreni dhe Peja, janë më të shkathëta në potencialin e resursit njerëzor dhe biznesor, por te përfaqësimi i të zgjedhurve të tyre në Parlamentin e Kosovës. Deputetët gjilanas, të cilët morën votat edhe të këtyre përfaqësuesve të bizneseve, deri më tani, nuk e ngritën asnjë zë për zhvillimin ekonomik të Anamoravës. Këta përfaqësues të popullit, të cilët u ngritën shkallëve të Parlamentit, me ndihmën e votës suaj, lërë që nuk propagandaun për krijimin e një ambienti të zhvillimit biznesor, por ju futën në kredi të larta, duke e rënduar gjendjen ekonomike të Gjilanit” mendon Xhelili.

“Thithja e donacioneve dhe investimeve, do të sillte për bizneset tuaja, përparim dhe natyrisht edhe ngritje të ekonomisë së rrënuar të kësaj komune. Mirëpo edhe ato pak projekte, që vijnë në Gjilan, i marrin nga komunat përreth, duke sjell madje edhe ushqimin për punëtorët prej vendeve nga vijnë. E të zgjedhurit Tuaj, deputetët popullorë, afër 80 për qind e tyre, as telefonat nuk ua hapin e lëre më t’ju pranojnë në bisedime për ta nxjerr nga mjerimi financiar në të cilën ka rënë biznesi gjilanas. Këta përfaqësues “legjitim” të popullit, bëjnë pazare me kompanitë e komunave të tjera, për interesat e tyre personale” thotë Xhelili.

Xhelili thotë se duhet njëherë e përgjithmonë përfaqësuesit e biznesit në Gjilan ta kuptojnë, se disa maskarenj të zgjedhur në Parlament, kanë shkuar me votën e tyre, për t’i përfaqësuar, e kur ata as veten s’mund ta përfaqësojnë, nga frika që kanë nga shefat e tyre politikë.

“Ky fenomen i shkatërrimit të bizneseve në Gjilan, mund të parandalohet, nëse liroheni nga lajthitja dhe ndikimet e ulëta politike, duke u thënë Stop, këtyre dukurive në favor të zhvillimit të shëndetshëm të sferës së biznesit privat, njërën nga shtyllat kryesore të zhvillimit të komunës”, thekson Selver Xhelili, kryetar i Degës së Republikanëve të Kosovës, për Gjilan./rajonipress/