Strakosha merr kritika, pranoi gjashtë gola ndaj Olimpiakosit

Thomas Strakosha ka kaluar një mbrëmje të errët kundër Olimpiakosit. Këta të fundit fituan në shifrat 6-0 ndaj AEK-ut në Kupën e Greqisë, duke mos i lënë asnjë histori ndeshjes së kthimit për ta marrë biletën e kualifikimit para kohe.

Ndërkohë për Strakoshën kjo mund të jetë mbrëmja që ka pësuar më shumë gola brenda 90 minutave në gjithë historinë e tij, jo pak, por 6 gola. E gjitha kjo për shkak të një mbrojtje inekzistente të AEK-ut, ndërsa Olimpiakosi mund të kishte shënuar akoma më shumë.

Për mediat greke, Strakosha nuk kishte faj në asnjë nga 6 golat e pësuar, por ka marrë notën më të dobët pasi theksohet se nuk bëri asnjë pritje të vetme gjatë 90 minutave. Madje si për ironi të fatit i vetmi rast ku Strakosha shpëtoi portën, nuk u quajt në statistikat e takimit pasi ishte pozicion jashtë loje./Indeksonline/