Shkolla “Vesel Muja” në Mihir kremtoi Ditën e Shkollës

Gjilan – Në ambientin e shkollës fillore dhe të mesme të ultë “Vesel Muja” të fshatit Mihir të Komunës së Gjilanit u kremtua Dita e shkollës, ku merrnin pjesë nxënësit e kësaj shkolle, mësimdhënësit, prindërit, ish arsimtarë të kësaj shkolle, mysafirë të ndryshëm si dhe përfaqësues të pushtetit lokal.

Këtë manifestim me pjesëmarrje e nderuan edhe Kryetari i Komunës së Gjilanit, Qemajl Mustafa, Salihe Mustafa deputete në Kevendin e Republikës së Kosovës, Drejtori i Drejtorisë për arsim, Bujar Nevzadi me bashkëpunëtorët e tij, udhëheqës të partive të ndryshme të Komunës së Gjilanit si dhe familja e Vesel Mujit, emrin e të cilit e mban kjo shkollë.

Fillimisht fjalën e rastit e mori Drejtori i shkollës Ajvaz Beqiri, i cili së pari i falënderoi të gjithë për pjesëmarrje duke i uruar nxënësit, prindërit, personelin arsimor të shkollës “Vesel Muja”, i cili tërë jetën ia kushtoi edukimit të gjeneratave të reja.

Më pas është ndalur duke përmendur të arriturat e kësaj shkolle gjatë periudhës katër vjeçare, që nga pavarësimi i kësaj shkolle. Gjatë këtyre viteve janë bërë shumë punë të mëdha në këtë shkollë, është vizituar nga shumë personalitete, organizata e shoqata, të cilat kanë premtuar se do të ndihmojnë këtë shkollë. Është premtuar asfaltimi i rrugës, ngrohja, paisja e një klase për punë praktike etj.

Drejtori i Drejtorit për arsim , Bujar Nevzadi i uroi përvjetorin e katërt të pavarësimit të kësaj shkolle, duke i falënderuar për sukseset, duke premtuar edhe më tutje mbështetje për këtë shkollë në përmirësimin e kushteve.

Nevzadi ka përmendur edhe punët që janë bërë gjatë viteve të fundit në ndërtimin e shkollave të komunës së Gjilanit, duke premtuar se në të ardhmen do të ndërtohen edhe disa shkolla, si ajo e mjekësisë, një shkollë te tregu i gjelbërt dhe kudo që do të ketë nevojë.

Kryetari i Komunës së Gjilanit, Qemajl Mustafa, ka përshëndetur të gjithë pranishmit duke i uruar nxënësit, arsimtarët dhe drejtorin e shkollës për punën e palodhshme që është bërë gatë këtyre katër viteve, duke premtuar se ai edhe në të ardhmen do të punojë në përmirësimin e kushteve, për një shkollim normal.

Ai ka përmendur edhe strategjitë që ka për shoqërinë, ndërsa prioritet i tij do të jetë shkolla, përmirësimi i kushteve, pajisja me kabinete, salla dhe çdo gjëje që mundëson funksionimin sa më të mirë të shkollës.

Në emër të familjes, fjalë rasti ka paraqitur Elez Muja, veteran e arsimit, përndryshe vëllai i Vesel Mujit, i cili ka porositur nxënësit që të mësojnë sa më shumë, arsimtarët të punojnë për ngritjen e nxënësve, sepse për këtë gjithnjë është mundur dhe ka punuar Veseli.

Në fund të këtij manifestimi u dha një program i pasur kulturo-artistik ku me recitale, këngë e valle kanë argëtuar të pranishmit, ku kanë shprehur dijen, talentin dhe vendosmërinë për të vazhduar përpara.

Krejtësisht në fund, të pranishmit kanë mundur të shikojnë punën e nxënësve të kësaj shkolle, të cilët me punimet e tyre kanë mahnitur të pranishmit derisa për mysafirët u shtruar një koktej rasti./rajonipress/