Rasti “Kosovarët therin zviceranin”, sërish para gjyqit

Gjykata: Lexuesi mesatar, nga titulli në gjermanishte mund të kuptojë se të gjithë kosovarët janë kriminelë dhe si «therës» madje janë edhe te rrezikshëm.

Procesi rreth afisheve të SVP-së me mbishkrimin «Kosovarët therin zviceranin» që pati ndodhur në vitin 2011, ende nuk e ka marrë epilogun e tij gjyqësor. Më 8 mars do të zhvillohet procesi i radhës në Gjykatën e lartë të Bernës ndaj dy funksionarëve të lartë të kësaj partie, të cilët mbahen përgjegjës për fushatën me pllakatin e përmendur, raporton sda.ch.

Fjala është për sekretarin e përgjithshëm të kësaj partie, Martin Baltisser dhe zëvendësen e tij, Silvia Bär. Ata, në shkallën e parë (Gjykata regjionale Bern-Mittelland) ishin dënuar me gjobë me kusht për diskriminim në bazë race, transmeton albinfo.ch. Pastaj të dy e kanë atakuar vendimin gjyqësor në një shkallë më të lartë, pra në Gjykatën e Lartë të Kantonit të Bernës, duke u thirrur në të drejtën e shprehjes së mendimit të lirë.

Sipas tyre, në Zvicër duhet të bëhet e mundur që gjendja të prezantohet ashtu siç është. Teksti i afishes «Kosovarët therin zviceranin», ishte publikuar në gusht 2011 në shumë gazeta dhe në faqen e SVP-së në internet, përcjell albinfo.ch. Dy të akuzuarit, para gjyqit kanë thënë se me këtë tekst vetëm është përshkruar gjendja, gjegjësisht është konstatuar sulmi ndaj një zvicerani.

Sipas tyre kjo në tekstin në gjuhën frënge është më e qartë. Titulli në gazetat në gjuhën frënge është «Des Kosovars poignardent un Suisse».

Por Gjykata Regjionale nuk është bindur nga kjo. Lexuesi mesatar, nga titulli në gjermanishte mund të kuptojë se të gjithë kosovarët janë kriminelë dhe si «therës» madje janë edhe te rrezikshëm. Kjo sipas gjykatës është një përgjithësim i padiferencuar dhe së këndejmi, i palejueshëm.

Siç është shkruar tashmë, teksti origjinal më vonë është modifikuar dhe nga “kosovarët”, është bërë “kosovari”.