Përmbyllet suksesshëm “Vjeshta letrare e Gjilanit”

Gjilan – Ars Clubi “Beqir Musliu” me një koktej rasti ka përmbyllur suksesshëm aktivitetin e saj krijues për vitin 2012. Sabit Rrustemi tha se janë përpjekur që gjatë vitit 2012 të sjellin para gjilanasve libra të rinj dhe me vlera.

Në prani të shumë krijuesve, poetëve, shkrimtarëve edhe nga diaspora e Kosova Lindore Ars Clubi “Beqir Musliu” e ka përmbyllur “Vjeshtën letrare të Gjilanit” edicioni i tretë.

Sabit Rrustemi udhëheqës i këtij asociacioni kulturor tha se viti 2012 për ta ishte një vit i mbarë kurse Vjeshta letrare e Gjilanit ka sjellur krijues, botime e evenimente të rëndësishme kulturore. “Jemi përpjekur që gjatë vitit 2012 para lexuesve e krijuesve gjilanas të sjellim libra të rinj e me vlerë” tha Rrustemi.

Këtë eveniment kulturor e ka përgëzuar edhe Qemajl Mustafa i cili tha se Ars Clubi ka bërë punë të mira sepse e ka mbajtur dhe avancuar jetën kulturore në Gjilan duke promovuar libra e vepra të rëndësishme për krijuesit gjilanas.

Edhe Veton Nevzati drejtor i kulturës tha se institucionet komunale e kanë përkrahur fushën e kulturës dhe në veçanti botimet e rëndësishme dhe me vlerë për qytetin dhe krijimtarinë.”Jam i sigurt se vitin tjetër do të kemi një përkujdesje edhe më të madhe në fushën e kulturës , meqë këtë na i mundëson edhe buxheti që këtë vit është ndarë me kohë” tha Nevzati.

Në përmbyllje të Vjeshtës letrare ishin të pranishëm edhe Bujar Salihu poet e krijues që jeton dhe vepron në Zvicër, pastaj Nehat Ramizi krijues nga Presheva, Halim Hasani e Arsim Halili nga Bujanoci, Faton Bislimi kuadër universitar në Kanada, Xhevat Latifi, Avni Rudaku e Aziz Mustafa dhe poete të reja e me perspektivë për Gjilanin./rajonipress/