Mërgimtarët: Kemi pritur shumë më shumë nga qeverisja e LVV dhe Alban Hyseni, jemi të dëshpëruar

Gjilan – Mërgimtarët gjilanas që këto ditë po i kalojnë pushimet e tyre në vendlindje janë shprehur të zhgënjyer me qeverisjen e LVV në Gjilan. Ata thonë se Gjilani ka mbetur shumë më mbrapa se Ferizaji dhe komunat e tjera dhe krejt kjo falë menaxhimit të dobët të qeverisjes. Por ka edhe të atillë që mendojnë se LVV ende mund të bëjë mrekullira.

Rruga e Bujanocit e papërfunduar dhe në gjendje të mjerueshme, e me shumë defekte, rruga e Prishtinës e mbetur në gjysmë, rruga e Kllokotit me shumë gropa dhe e dëmtuar, parku i qytetit i mirëmbajtur keq, rrugët të papastra, mungesa e investimeve në projekte kapitale, janë vetëm disa nga pikat që mërgimtarët i kanë vërejtur si dobësi e qeverisjes së Alban Hysenit.

Bajrami mërgimtar nga Zvicra mendon se Gjilani ka pësuar dhe po pëson nga pazotësia e kuadrove të LVV.

“Unë e kam votuar Albin Kurtin se Alban Hyenit kurrë votë nuk i kisha dhënë, ama edhe Albini e ka shkelur keq Gjilanin, vetëm shikojeni urën e Badovcit dhe hyrje daljet e qytetit qysh kanë mbetur shkret” shprehet ai.

Edhe, Kadrija që jeton në Amerikë thotë se ka pritur shumë më shumë nga qeverisja e LVV dhe Alban Hyseni.

“Jam shumë i zhgënjyer me këtë qeverisje dhe me këta njerëz. Qysh asnjë punë të hajrit nuk e kanë krye deri në fund. Rruga e Bujanocit ishte krejt goma e gropa. Nuk pash ndonjë përparim as brenda qytetit. Vërtet mjerim për këtë qeverisje e cila vetëm po e thellon Gjilanin në krizë ekonomike dhe politike” tha ky mërgimtar.

Nuredini mërgimtar nga Suedia mendon se LVV dhe Albin Kurti ende kanë kohë për ta quar përpara Kosovën.

“Unë ende i besoj Albinit sepse rruga e tij është e drejtë. Ai nuk është i korruptuar dhe nuk blihet lehtë nga Serbia sikurse liderët e tjerë. Ky Alban Hyseni fakt që nuk kishte punuar asgjë në Gjilan, po shpresa ende ekziston” thotë ai./rajonipress/