Limaj: Jam viktimë e SMS-ve të montuara

Lideri i NISMA për Kosovën, Fatmir Limaj thotë se ‘përndjekja e tij’ për pesë vjet nga drejtësia tregon gjendjen e sistemit të drejtësisë në vend. Ai tha se ishte viktimë e SMS-ve të montuara dhe për këtë e krahasoi vendin me Maqedoninë dhe skandalin e përgjimit nga ana e Qeverisë.

“Jam viktimë e SMS-ve të montuara”, tha Limaj, në një intervistë për Express.

Tha se për pesë vjet, nuk u dëshmua asgjë e paligjshme në të cilën ai mund të ishte i përfshirë.

“Për pesë vite e dini atë spektaklin që u bo, dhe nuk ka asnjë veprim asnjë gjë tregon se në çfarë sistemi të drejtësisë jetojmë, tregon më së miri se çfarë sfondi ka pasur kjo ndjekje dhe çfarë motive ka pasë”, tha Limaj.

Limaj bëri me gisht drejt Shërbimit Informativ të Kosovës (SHIK) për betejën e tij me drejtësinë.

“Kjo më së miri tregon se kur ju e përdorni sistemin e drejtësisë për të eliminuar dhe shkatërruar njerëz dhe kjo nuk çon tjetër, veç në logjikën e lindjes diktatoriale. Kjo është logjikë që po e shohim në lindje, këto diktatura që po dalin në emër të zgjedhjeve, demokracisë”, theksoi Limaj.