Lenjani i ashpër me institucionet qendrore: Turp, po e neglizhoni problemin e brezit kufitar

Kamenicë – Selver Lenjani thotë se u ka shkruar disa here Vjosa Osmanit, Glauk Konjufcës e Albin Kurtit, por asnjëherë, asnjëri nuk e kanë parë të udhës që të merren me problemet e brezit kufitar. Ne nuk kemi kërkuar lëmoshë, as ndonjë vend pune, as mjete financiare apo ndonjë pozitë, por kemi kërkuar nga ju angazhim dhe seriozitet në trajtimin e problemit kufitar në Karaqevë ka shkruar Lenjani.

Selver Lenjani përfaqësues i fshatit Karaçevë vazhdon të angazhohet me gjithë forcën e tij për t`iu bërë presion institucioneve qendrore, që të merren më seriozisht me problemet që ka brezi kufitar.

Lenjani thotë hapur se është tejet i zhgënjyer në Vjosa Osmanin, Abin Kurtin e Glauk Konjufcën të cilët asnjëherë nuk janë marrë seriozisht, me kërkesat reale që ka brezi kufitar.

“Nuk e kuptojë si është e mundur që gjithë ato shkresa e letra zyrtare, i kam dërguar në adresë të këtyre institucioneve dhe asnjëri se ka marrë mundin të përgjigjet, ose të qaj hallet tona. Mos harroni Qeveri e Presidencë se vija kufitare e Kosovës mbrohet në Karaçevë dhe nuk është mirë ta neglizhoni situatën. Që nga viti 2001 deri sot ky territor kufitar ballafaqohet me probleme të shumta sepse Serbia po e mbanë pezull rrugën e asfaltuar nga kthesa e Novosellës, deri në hyrje të Karaçevës. Kjo arterie e rëndësishme për të cilën pretendon Serbia se është e tyre, mbetet pika kyçe për banorët e brezit kufitar” ka shkruar Lenjani.

Lenjani thotë me nervozizëm se asnjëherë s`ka kërkuar ndonjë benificion nga institucionet qendrore, madje as lëmoshë, as mjete financiare, po thjesht kemi kërkuar angazhim dhe seriozitet në zgjidhjen e këtij problemi.

“I lutem zotit që e kemi KFOR-in amerikan dhe policinë e Kosovës, që janë të pranishëm 24 orë sepse ndryshe ne nuk mund të jetojmë në Karaçevën e lirë, përkundër qëndrimit stoik të banorëve. Ne nuk do të lëshojmë pe sepse nuk kemi tokë për t`i falur askujt dhe do të sakrifikojmë me të gjitha mundësit tona, që brezi kufitar të jetoj e veprojë në trevat e veta” tha Lenjani.

Lenjani ka një kërkesë për drejtuesit e institucioneve qendrore.

“Mos e neglizhoni brezin kufitar dhe mos shfaqni rezerva se kinse nuk po e dini se çfarë po ndodhë tek ne, merruni seriozisht dhe debatojeni në çdo instancë e takim me NATO problemin e ndjeshëm të Karaçevës dhe mos lejoni, që të ndodhë ndonjë përshkallëzim apo revoltë e brezit kufitar” tha Lenjani./rajonipress/