Lenjani e paralajmëron Kastratin, rruga mund të përdoret nga KFOR-i, por jo edhe nga ushtria serbe

Kamenicë – Selver Lenjani ka ngritur shqetësimin e tij rreth propozimit të Qëndron Kastratit që një rrugë të përdoret për nevojat e KFOR-it. Kjo rrugë në asnjë mënyrë nuk guxon të përdoret për qëllime tjera sepse ne nuk do të heshtim asnjëherë thotë Selver Lenjani.

Propozimi i Qëndron Kastratit që një rrugë të shfrytëzohet për nevojat e KFOR-it ka hasur në shqetësimin e Selver Lenjanit i cili e ka paralajmëruar Kastratin që të ketë kujdes në mënyrë që kjo rrugë mos të përdoret edhe për qëllime tjera.

“Rruga mund të përdoret për nevojat e KFOR-it, por në asnjë mënyrë për nevojat e ushtrisë apo të policisë serbe. Do të ishte katastrofave nëse kreu i komunës bije në këto kurthe. Çdo variant tjetër për ne është i papranueshëm dhe do të reagojmë në çdo kohë” u shpreh Lenjani për rajonipress.

Ndryshe Qëndron Kastrati një ditë më herët e bëri të ditur propozimin e tij që një rrugë do të shfrytëzohet për nevojat e KFOR-it.

“Një nga shqetësimet e përbashkëta të të gjitha niveleve, si pasojë e Marrëveshjes së Kumanovës mbetet Karaqeva. Për të qenë në krye të detyrës dhe sa më pranë komunitetit, KFOR-i na është drejtuar me kërkesën për të rregulluar një rrugë më të shkurtër e cila kalon kah panelet solare ka shkruar Qëndron Kastrati. Kjo rrugë do të përdoret vetëm për nevoja të KFOR-it dhe do të shenjohet përkitazi me destinimin e saj. Ne kemi diskutuar me ekspertë të fushës; me Komisionin Shtetëror për Shënjimin dhe Mirëmbajtjen e Kufirit si dhe mekanizma të tjerë të nivelit qendror dhe kemi vendosur të japim pëlqimin tonë për këtë përdorim: kishte thënë Kastrati./rajonipress/