Kuqi vazhdon kontratën me Honkan

Shefki Kuqi nuk do të largohet nga Honka. Përkundrazi ai ka vazhduar kontratën edhe për dy vite. Trajneri kosovar arriti të mbijetojë në elitën e futbollit finlandez, duke përfunduar në pozitën e parafundit.

“Po, jemi pajtuar për të vazhduar. Kontrata ime është edhe për dy vite”, tha Kuqi, transmeton “svenska.yle.fi”. Gjatë kampionatit që sapo përfundoi, Honka u përballë me vështirësi financiare, duke u vonuar edhe pagat lojtarëve. Tani duket se ky problem është zgjidhur.

“Nëse do të shkruaja një libër, ai do të ishte libri më i mirë për futbollin”, ka thënë Kuqi, duke iu referuar vështirësive te Honka. Për ish-futbollistin e mirënjohur, skuadra e Honkas ishte e para ku e nisi zejen e trajnerit.