KKSB: Në prag të festave të fundvitit, thirrje për festime pa armë dhe për kujdes të shtuar në përdorimin e fishekzjarrëve
RajoniPress
17:03, 19 Dhjetor, 2024
| 6 muaj më parë
Viti – Komandanti i Stacionit Policor në Viti, Afrim Halili, foli për situatën e sigurisë në komunë. Ai informoi se këtë vit është regjistruar një aksident fatal, por që ka pasur një ulje prej 50% të vjedhjeve të rënda. Po ashtu, ka pasur rënie të aksidenteve në komunikacion dhe një rritje të numrit të gjobave, ku këtë vit janë shqiptuar 8,250 gjoba dhe janë regjistruar gjithsej 440 raste të ndryshme.
Nën drejtimin e zëvendëskryetarit të Komunës së Vitisë, Hasan Aliu, sot u mbajt mbledhja e fundit për këtë vit e Këshillit Komunal për Siguri në Bashkësi (KKSB).
Në këtë mbledhje u diskutua mbi zbatimin e planit të punës për vitin 2024, ndërsa u miratua gjithashtu Drafti i Planit të Punës për vitin 2025.
Ky plan përmban 16 objektiva, të cilat janë shoqëruar me aktivitete të ndryshme që lidhen me çështjet e sigurisë në bashkësi.
Zëvendëskryetari Aliu shprehu shqetësimin e tij për demolimin dhe shkatërrimin e stadiumit në fshatin Pozheran, duke theksuar se dëmet janë të mëdha dhe duke e cilësuar këtë akt si vandalizëm nga individë të papërgjegjshëm.
Nga ana tjetër, komandanti i Stacionit Policor në Viti, Afrim Halili, foli për situatën e sigurisë në komunë.
Ai informoi se këtë vit është regjistruar një aksident fatal, por që ka pasur një ulje prej 50% të vjedhjeve të rënda.
Po ashtu, ka pasur rënie të aksidenteve në komunikacion dhe një rritje të numrit të gjobave, ku këtë vit janë shqiptuar 8,250 gjoba dhe janë regjistruar gjithsej 440 raste të ndryshme.
Halili po ashtu theksoi se tani për tani është vërejtur një fenomen i ri që po vjen nga rrjetet sociale, “Sfida Spiderman”, për të cilën në komunën e Vitisë janë shënuar dy raste me lëndime trupore. Duke marrë parasysh se jemi në prag të festave të fundvitit, në mbledhje u bë thirrje për festime pa armë dhe për kujdes të shtuar në përdorimin e fishekzjarrëve.
Pavarësisht sfidave, anëtarët e këshillit e vlerësuan gjendjen e sigurisë në Komunën e Vitisë si të qetë dhe të qëndrueshme./rajonipress/
