Kim Mehmeti: Shqiptarët janë fajtorë për sllavizmin e Shkupit

Prishtinë – Për shkrimtarin dhe publicistin Kim Mehmeti, Shkupi është duke u harruar njësoj sikur Manastiri. E fajin për këtë, sipas tij, e kanë vetë shqiptarët.

Ka fajësuar politikën shqiptare të Maqedonisë, Kosovës dhe Shqipërisë, teksa ka thënë se me qëllim ata janë duke e lënë Shkupin që të transformohet në një kryeqendër ku elementi i vetëm që nuk do të ekzistojë, do të jetë ai shqiptar, shkruan sot Koha Ditore. I ftuar në Prishtinë për promovimin e librit të tij më të ri, “Shkupi”, Mehmeti ka kritikuar ashpër politikën dhe shoqërinë shqiptare, duke thënë se neglizhenca e dekadave të fundit ndaj Shkupit po u krijon mundësi maqedonasve që shqiptarët e këtij kryeqyteti t’i zhvendosë “rrugës për në Kaçanik”.

Në një bashkëbisedim gati njëorësh me nënkryetarin e Kuvendit të Kosovës nga “Vetëvendosje”, Glauk Konjufca, shkrimtari Mehmeti ka thënë se “fakti që për Shkupin janë 30 monografi të shkruara nga serbët, 5 nga kroatët, 12 nga bullgarët e asnjë nga shqiptarët, tregon se slogani që Shkupi është kryeqendër e shqiptarëve është vetëm i tillë”. Qysh në fillim të promovimit që është konceptuar si bashkëbisedim, Mehmeti e ka cilësuar librin e tij “Shkupi” një “ese historike”.