“Kapërcimi i Rubikonit drejt pavarësisë” bashkoi pozitë e opozitë

Prishtinë – Promovimi i librit “Kapërcimi i Rubikonit drejt pavarësisë”, i autorit Adriatik Kelmendit, ka bërë bashkë pozitën dhe opozitën. Në ceremoninë e librit që shpjegon në detaje procesin e shtetbërjes ishin kryeministri i vendit e figura të rëndësishme të politikës vendëse.

Publicisti Halil Matoshi, duke qenë lexuesi i pari i librit, ka thënë se intervistat e përmbledhura në këtë libër jo vetëm që do të kënaqin kureshtjet e lexuesve të rinj, por do t’ua freskojnë kujtesën atyre duke dëgjuar tek flisnin live këto personazhe.

“Ideja e librit jo vetëm pse buron nga emisioni shumë i shikuar i KTV-së, “Rubikon”, por edhe për faktin se ndërlidhet me arketipin e “Kalimit të rubikonit” si fat dhe fatalitet, formëson botëkuptimin “Bëje ose vdis”, ka thënë Matoshi. Ndërsa, sipas tij, libri do të jetë referencë edhe për politikanët e ardhshëm dhe studiuesit e historisë.

E autori i librit, Adriatik Kelmendi, ka thënë se pikërisht sot nuk është data, por dita ku Kosova do të bëhej një shtet i zhvilluar dhe konkurruese me shtetet e rajonit dhe më gjerë, dhe po ashtu shtet ku do të jetë i mirëqenë për të gjithë qytetarët e saj. “Secili nga ju, me punë të ndryshme, me qasje të ndryshme, vazhdoni që të debatoni si të bëhet Kosova më e mirë”, ka shtuar Kelmendi.

“Kapërcimi i Rubikonit drejt Pavarësisë” është botimi i Grupit “Koha”, ndërsa në të janë të përfshira 32 intervista të zhvilluara gjatë katër vjetëve të procesit të ndërtimit të shtetit të Kosovës.