Hyseni, priti ambasadorin e Turqisë dhe ministrin Damka, diskutojnë për projektet e përbashkëta

Gjilan – Kryetari i Komunës së Gjilanit, Alban Hyseni, bashkë me nënkryetarin Kadir Hyseinin, kanë prit në takim ambasadorin e Republikës së Turqisë në Kosovë, Sabri Tunç Angılı dhe ministrin e Zhvillimit Rajonal, Fikrim Damka, bashkë me zëvendësministrin Elldin Uglarin dhe drejtorin e DPKZHR-së Ylber Çitakun.

Temë e bisedës ishin realizimi i projekteve të përbashkëta në të mirën e banorëve të Komunës së Gjilanit.

Alban Hyseni, tha se kishte kënaqësinë të pres në takim ministrin e Zhvillimit Rajonal, Fikrim Damka dhe ambasadorin e Republikës së Turqisë në Kosovë, Sabri Tunç Angılı.

“Diskutuam për projektet e përbashkëta që do të ndikojnë drejtpërdrejt në zhvillimin ekonomik dhe infrastrukturor të komunës sonë. Bashkëpunimi me institucionet qendrore dhe mbështetja nga partnerët ndërkombëtarë janë çelësi për një Gjilan më të zhvilluar”, tha Alban Hyseni.

I pari i Gjilanit, tregoi se në këtë takim, i shprehu ambasadorit mirënjohjen e thellë për kontributin e çmuar të komunitetit turk në komunën tonë dhe për mbështetjen e vazhdueshme që Turqia i ka dhënë Kosovës ndër vite.

Ambasadori i Turqisë në Kosovë Sabri Tunç Angılı, shprehu përkrahjen për projektet që fuqizojnë zhvillimin rajonal dhe thellojnë marrëdhëniet ndërmjet institucioneve lokale dhe ndërkombëtare.

Ministri i Zhvillimit Rajonal, Fikrim Damka, tha se qëllimi i vizitës ishte diskutimi i bashkëpunimit me Komunën e Gjilanit.

“Gjatë takimit u diskutua për ecurinë e projekteve aktuale, sfidat e implementimit dhe mundësitë për bashkëpunime të reja në të ardhmen”, tha Damka./rajonipress/