Haziri: Pas vendimit të Kushtetueses na duhen 24 orë për formimin e qeverisë

Nënkryetari i Lidhjes Demokratike të Kosovës, Lutfi Haziri, ka thënë se pas vendimit të Gjykatës Kushtetuese rreth dekretit të presidentit Hashim Thaçi për 24 orë do ta formojnë qeverinë e re, të cilën pritet ta udhëheqë kjo parti.

Haziri në një intervistë për “Ekonominë Online” ka thënë se do ta respektojnë çdo vendim të Gjykatës Kushtetuese.

“Çfarëdo vendimi që të sjellë Gjykata Kushtetuese ne e respektojmë. Gjithçka është në pritje dhe vendimi i Gjykatës Kushtetuese ia jep të drejtën atij ose atyre për ta bërë qeverinë dhe institucionet legjitime dhe kjo çështje është procedurale mandej.

Kurdo që gjykata e sjell vendimin 24 orë janë të mjaftueshme që të kemi institucione të reja ekzekutive”.

Haziri ka komentuar edhe punën 100-ditëshe të qeverisë “Kurti”. Sipas tij, përveç largimeve, shkarkimeve dhe emërimeve politike, veprime tjera nuk ka ndërmarrë kjo qeveri.

“100 numërohen nga zgjedhja e qeverisë, mirëpo 50 ditë punë, e cila e ka humbur besimin për shkak të mocionit të mosbesimit.

Do të mbahet mend si qeveri e cila nuk ka arritur të realizojë 100-ditëshin si duhet, por detyrën kryesore e ka pasur pandeminë.

Çështje tjera përveç largimeve, shkarkimeve dhe emërimeve politike, veprime tjera nuk ka pasur Qeveria”.