Haradinaj paralajmëron transformimin e FSK-së: Ushtria garanton siguri

Kryeministri i Kosovës, Ramush Haradinaj ka thënë se transformimi i FSK-së në Ushtri garanton siguri për qytetarët e Kosovës, dhe gjithashtu për sigurinë rajonale.

Në një postim në facebook, kryeministri i vendit ka theksuar se ky process do të jetë i sigurt duke përfshirë të gjitha komunitetet në vend.

“Transformimi i FSK-së në Forca të Armatosura të Kosovës (FAK) është proces që garanton sigurinë e të gjithë qytetarëve të Kosovës, gjitha komuniteteve, si dhe kontribuon në sigurinë rajonale.Procesi do të jetë një sukses i garantuar dhe i sigurt, me përfshirje maksimale të të gjitha komuniteteve në Kosovë. Forcat e Armatosura të Kosovës do të kenë këtë mënyrë të përfshirjes së komuniteteve, me synimin e rritjes së numrit të tyre.”, ka shkruar Haradinaj.

“Në periudhën në vijim, do të intensifikojmë përpjekjet gjithëpërfshirëse për të arritur transformimin në Forca të Armatosura”, bëhet e ditur nga kryeministri.

Me rasti e “Ditës së Forcës” e cila mbahet nesër, Haradinaj ka thënë seqeveria është e bindur se FSK-ja do të ketë arritje të mëdha.

“Në prag të “Ditës së Forcës”, Qeveria e Republikës së Kosovës është e bindur dhe krenare për arritjet e Forcës së Sigurisë së Kosovës. Rruga e ndjekur e institucionit dhe pjesëtarëve të FSK-së është rrugë e bazuar në përkushtim, sakrificë dhe ndershmëri.Sot, FSK është profesionale, multi-etnike, si dhe e trajnuar mbi standardet dhe parimet demokratike të forcave të sigurisë”, ka thënë i pari i qeverisë së Kosovës.

Ai ka përmendur edhe disa statistika për pjesëmarrjen e komuniteteve në FSK.

“Suksesi në integrimin e komuniteteve jo-shumicë në FSK është plotësisht i dukshëm: në total, 10.07 për qind e pjesëtarëve të FSK-së janë nga komunitetet jo-shumicë, ndërsa nga komuniteti serb janë 4.2 për qind e pjesëtarëve të FSK-së”, ka thënë Ramush Haradinaj. /Lajmi.net/