Zuckerbergu ka gabuar: Privatësia nuk ka vdekur?

Një studim i fundit tregon se Mark Zuckerberg kishte gabuar në vlerësimet e tij.Tinejxherët janë të lodhur nga publikimet e të dhënave të jetës së tyre private në rrjetet sociale dhe ka shumë më shumë të tillë që kanë kujdes se çfarë shkruajnë, thotë studimi i fundit i bërë nga Market Researc Society, transmeton Telegrafi.

Tash ka çdo herë e më shumë “un-tagging” të fotografive, postime të rrejshme e madje edhe hapje të profileve të ndryshme me qëllim të fshehjes së informatave private dhe që këto profile të rrejshme të përdoren vetëm për gjëra zbavitëse, si lojërat.

Të rinjtë madje bëjnë postime të paqarta, të njohura si “vague-booking”, për të shtyrë vetëm miqtë e vërtetë të përgjigjen privatisht për detajet e mëtejshme.

Pra, gjithçka është në kundërshtim me pretendimet e themeluesit të rrjetit Facebook, Mark Zuckerberg, i cili në vitin 2010 kishte thënë se koha e privatësisë i takon së kaluarës.

Raporti madje thotë se po rriten përdoruesit e aplikacioneve si Snapchat, që fshin porositë dhe fotografitë, e kjo është dëshmi se të rinjtë brengosen nga ajo që të panjohurit mund të shohin.

Po ashtu, është vlerësuar se një e treta e përdoruesve në Twitter ka profil privat i cili ndahet vetëm me miqtë më të ngushtë. /Telegrafi/