PDK-ja e LDK-ja do ta shqyejnë edhe AKP-në

Privatizimi, proces i kriminalizuar dhe i politizuar. Pazaret partiake zvarrisin kompletimin e Bordit

“Dy partitë në koalicionin qeverisës, PDK-ja dhe LDK-ja, duket se do të vazhdojnë ta rrënojnë edhe më tepër kredibilitetin e AKP-së në tendencat e tyre për ta uzurpuar Bordin e saj me militantë të partive të tyre”, theksoi analisti Isa Mulaj

Analistë ekonomie dhe deputetë të Kuvendit të Kosovës janë të një mendimi se me veprimet e deritashme të stafit drejtues, Agjencisë Kosovare të Privatizimit (AKP) i ka humbur kredibiliteti.

Sipas tyre, Agjencisë që merret me privatizimin e pronës shoqërore të Kosovës tashmë askush më nuk po i beson, sepse haptazi po i favorizon politikanët dhe bizneset e lidhura me pushtetarët në privatizimin e pasurisë kosovare.

Edhe në Raportin e Progresit kritikohet jofunksionalizimi i AKP-së. Eksperti i ekonomisë, Milazim Abazi, thotë se nga të gjitha hulumtimet e pavarura të bëra në Kosove deri më tash, lidhur me korrupsionin, AKP-ja është cilësuar si institucioni më i korruptuar. “Qeveritë e pasluftës, duke mos pasur guxim që të merren me të, por edhe kjo e tanishmja është duke e luajtur rolin e makutit, duke e futur kokën në rërë dhe duke ia lënë stihisë punën e AKP-së. Kjo sjellje nuk është aspak serioze, siç nuk është serioze as mosfunksionalizimi i shumicës së bordeve të ndërmarrjeve publike dhe enteve qendrore rregullative”, ka thënë Abazi./kosova sot/