Oligarkët kosovarë ua shtojnë frikën investitorëve

Përkeqësohet indikatori për mbrojtjen e investimeve. Qeverisja PDK-LDK e zhyt në krizë ekonominë.

Njohësi i ekonomisë, Ibrahim Rexhepi, thekson se nga përkeqësimi i ambient afarist në Kosovë ka pasoja të mëdha. Sipas tij, pasoja e përgjithshme është mungesa e zhvillimit ekonomik, që do të thotë vazhdimi i varfërisë dhe papunësisë, si dhe ikja e njerëzve nga Kosova

Ekspertë të çështjeve ekonomike, përfaqësues të bizneseve dhe deputetë të Kuvendit të Kosovës nga radhët e opozitës, vlerësojnë se regresi që Kosova ka shënuar në indikatorin që ka të bëjë me mbrojtjen e investitorëve, i publikuar nga Banka Botërore, është problem serioz.

Ata janë në mendimit se raporti i BBsë është shqetësues për Kosovën. Sipas të dhënave të Bankës Qendrore të Kosovës, në vitin 2007 vlera e investimeve të huaja në Kosovë ishte rreth 450 milionë euro, kurse në vitin 2014 kjo shifër është jo më shumë se rreth 150 milionë euro. Investimet e huaja, sipas këtyre të dhënave, kanë filluar të rriten në vitin 2015.

Deri në maj, investimet e huaja direkte arritën në 157.7 milionë euro. Deputeti Pal Lekaj thotë se është për keqardhje fakti se në raportin e fundit të Bankës Botërore “Të bërit biznes”, ku flitet për mbrojtjen e investitorëve, Kosova është renditur në pozitën e 57-të, nga pozita e 54-t sa ishte vitin e kaluar. Për deputetin nga radhët e opozitës ky raport është shqetësues./kosova sot/