Ndërkombëtarët të distancohen nga mafio-politikanët

Të huajt po e tolerojnë kapjen e shtetit nga pushtetarët e sotëm.

“Shumica e të pasurve nga politika vazhdojnë të pasurohen dhe të lidhen me bizneset e tjera, duke krijuar klane e oligarki, duke krijuar mafinë politike e ekonomike dhe duke e kapur keq shtetin. Ata kanë kombinuar organizatat kriminale me politikën dhe zhvatjen e të gjitha formave. Duke pasur në dorë pushtetin, ata pastrojnë paratë e pista pa ndonjë vështirësi. Nuk do të ndryshojë asgjë, përderisa bashkësia ndërkombëtare nuk do ta ndërpresë bashkëpunimin me këto struktura për t’i zgjidhur problemet e tyre në rajon”, shprehet deputeti Adem Salihaj

Për mungesën e efikasitetit në luftimin të krimit të organizuar dhe korrupsionit në institucionet e shtetit të ri të Kosovës, analistët fajë- sojnë edhe ndërkombëtarët, të cilët kanë toleruar këtë klasë politike në pushtet.

Sipas tyre, edhe faktori ndërkombëtar bart një përgjegjësisë për tolerimin e mafio- politikanëve të korruptuar, të mafio-bizneseve të politikës në krijimin e monopoleve, për faktin se në 8 vjet para pavarësisë patën rolin kryesor në sundimin e ligjit, kurse edhe në periudhën e paspavarësisë vazhdon të ketë një rol të pashmangshëm ndikues nga prapaskena për të gjitha zhvillimet politike, që kanë të bëjnë me dhe rreth Kosovës.

Tani, kur shteti i Kosovës është ngulfatur dhe me pamundësi zhvillimi nga okupimi i mafio-politikanëve, analistët politikë konsiderojnë se është një moment kyç i distancimit të vetë ndërkombëtarëve nga këta politikanë-udhëheqës, të cilët nuk janë asgjë tjetër, pos zhvatës të të mirave dhe buxhetit të këtij shteti, që të mos u lejohet këtyre banditëve të keqpërdorin edhe emrin e ndërkombë- tarëve për abuzime dhe dëme që po ua sjellin qytetarëve dhe vendit.

Deputeti i LDK-së, Adem Salihaj, konsideron se shumica dërrmuese e të pasurve nga politika i kanë ngritur bizneset e tyre me zhvatje, evazion fiskal, hajni, kontrabandë e drogë për gjatë viteve të kaluara dhe kjo është një e vërtetë që dihet publikisht, e për fat të keq po vazhdon edhe sot në shumicën e rasteve. “Ata pastaj vazhdojnë të pasurohen dhe të lidhen me bizneset e tjera, duke krijuar klane e oligarki, duke krijuar mafinë politike e ekonomike dhe duke e kapur keq shtetin. Ata kanë kombinuar organizatat kriminale me politiken dhe zhvatjen e të gjitha formave. Duke pasur në dorë pushtetin, ata pastrojnë paratë e pista pa ndonjë vështirësi. Duke pasur para dhe ndikim, ata manipulojnë qytetarët e varfër e të pavetëdijshëm, duke marrë votën e tyre me mashtrim dhe duke rritur fuqinë e tyre në dëm të po këtyre qytetarëve. Në këtë aspekt nuk do të ndryshojë asgjë, përderisa bashkësia ndërkombëtare nuk do ta ndërpresë bashkëpunimin me këto struktura për t’i zgjidhur problemet e tyre në rajon”, shprehet Salihaj./kosova sot/