Mbi 2000 të dyshuar për korrupsion

Të korruptuarit kyresisht i shpëtojnë ndëshkimit të drejtësisë. Shumica e kallëzimeve penale hidhen poshtë.

Sipas Prokurorisë, në tërësi rezultojnë 717 raste të korrupsionit me 2007 persona. Ndërsa ende në sirtarët e prokurorëve, (lëndë që janë në punë, apo që janë në sirtarët e prokurorëve) kanë mbetur të pazgjidhura 589 raste me 1706 persona.

Sipas detyrës zyrtare, rezulton që në gjashtëmujorin e parë të këtij viti, Prokuroria të ketë nisur hetimet në 11 raste kundrejt 34 personave. Nga ana tjetër, rezulton se denoncuesit më të mëdhenj të rasteve të korrupsionit janë Policia e Kosovës me 98 raste për 197 persona, si dhe Agjencia Kundër Korrupsionit me 10 raste për 15 persona

Lëndët hetimore, ku objekt janë zyrtarët e lartë, është konfirmuar tashmë se janë mbajtur në sirtarët e prokurorive, duke pritur parashkrimin e tyre. Bëhet fjalë për lëndë të korrupsionit, të krimit të organizuar, të krimit ekonomik dhe jo vetëm. Sipas një burimi të gazetës nga radhët e Prokurorisë e shtetit, nëse i referohemi viteve të kaluara, viti 2015 është për t’u mburrur, pas ngritjes së aktakuzave si ndaj ishkryegjyqtarit Enver Hasani, apo në rastin 13 zyrtarëve komunalë, si dhe hetimet në rastin e kryegjyqtarit të suspenduar të Apelit, Sali Mekaj, por edhe të të tjera raste, të cilat në rrethanat e viteve të kaluara nuk do të procedoheshin ndonjëherë. Kjo për arsye se janë mbajtur në sirtarë dhe janë amnistuar të dyshuarit.

Aktualisht, Prokuroria e shtetit, ashtu siç ka konfirmuar zëvendëskryeprokurorja Sevdije Morina po shënjestron rastet më të mëdha të natyrës korruptive për të ndjekur zhvillimin e tyre nga afër deri në përfundimin e tyre./kosova sot/