SHFMU “Nazim Hikmet” në Dobërçan organizon ligjëratë për sigurinë në internet dhe mbrojtjen e privatësisë së nxënësve

Gjilan – Në SHFMU “Nazim Hikmet” në Dobërçan, më 23 tetor 2026, është mbajtur një ligjëratë informuese dhe ndërgjegjësuese për sigurinë në internet, përdorimin e përgjegjshëm të rrjeteve sociale dhe mbrojtjen e të dhënave personale.

Aktiviteti u organizua në bashkëpunim me Policinë e Kosovës, përkatësisht Policinë e Komunitetit, dhe përfshiu nxënësit e klasave VI–IX.

Gjatë ligjëratës u trajtuan çështje që lidhen me keqpërdorimin e të dhënave personale, publikimin dhe shpërndarjen e fotografive pa pëlqimin e personave të përfshirë, cenimin e privatësisë në hapësirën digjitale, si dhe pasojat e mundshme ligjore të këtyre veprimeve.

Nxënësit patën mundësi të bashkëbisedojnë me përfaqësuesit e Policisë së Komunitetit dhe të marrin këshilla praktike për mbrojtjen e privatësisë, respektimin e të drejtave të të tjerëve dhe parandalimin e rreziqeve gjatë përdorimit të internetit.

Në kuadër të këtij aktiviteti, shkolla falënderoi Policinë e Kosovës, veçanërisht policen e komunitetit, Adile Shabani, së bashku me bashkëpunëtorët e saj, për bashkëpunimin dhe kontributin në edukimin dhe ndërgjegjësimin e nxënësve.

Po ashtu, shkolla u bëri thirrje prindërve që të bashkëbisedojnë vazhdimisht me fëmijët e tyre për përdorimin e sigurt të internetit dhe rrjeteve sociale, duke theksuar rëndësinë e mosshpërndarjes së fotografive, videove apo të dhënave personale të personave të tjerë pa pëlqimin e tyre.

Aktiviteti synon të forcojë vetëdijen e nxënësve për përgjegjësinë individuale në mjedisin digjital dhe rëndësinë e bashkëpunimit ndërmjet shkollës, familjes dhe institucioneve në parandalimin e keqpërdorimeve në internet.

Mesazhi i aktivitetit është i qartë: siguria në internet dhe mbrojtja e privatësisë janë përgjegjësi e përbashkët./rajonipress/