Kamenica nis fushatën kundër trafikimit me qenie njerëzore, theksohet bashkëpunimi me Policinë

Kamenicë – Komuna e Kamenicës ka nisur aktivitetet në kuadër të Fushatës Kundër Trafikimit me Qenie Njerëzore, me synim vetëdijesimin e qytetarëve për rreziqet e kësaj dukurie dhe rëndësinë e parandalimit të saj.

Në kuadër të këtyre aktiviteteve, koordinatorja e Njësisë Komunale për të Drejtat e Njeriut (NJKDNJ), Nazmije Demolli Kastrati, ka vizituar Stacionin Policor në Kamenicë, ku është pritur nga komandanti Basri Shkodra.

Gjatë takimit është diskutuar për bashkëpunimin dhe koordinimin e aktiviteteve të përbashkëta për parandalimin e trafikimit me qenie njerëzore. Po ashtu, është theksuar rëndësia e informimit të qytetarëve për identifikimin dhe raportimin e rasteve të dyshimta.

Si pjesë e fushatës, janë shpërndarë materiale informuese për qytetarët, me mesazhe ndërgjegjësuese për mbrojtjen nga trafikimi me qenie njerëzore, veçanërisht të fëmijëve dhe personave të cenueshëm.

Koordinatorja e NJKDNJ-së, Nazmije Demolli Kastrati, ka falënderuar komandantin Shkodra për pritjen dhe gatishmërinë për bashkëpunim, duke vënë në pah rëndësinë e koordinimit ndërinstitucional në mbrojtjen e të drejtave të njeriut dhe rritjen e sigurisë së qytetarëve.

Fushata synon të rrisë ndërgjegjësimin e qytetarëve për këtë fenomen dhe të inkurajojë raportimin e rasteve të dyshimta, me qëllim parandalimin e trafikimit dhe mbrojtjen e personave në rrezik.

Mesazhi i fushatës është i qartë: “Trafikimi na prek të gjithëve! Ta mbrojmë veten dhe fëmijët tanë! Mos heshtim! Së bashku ta parandalojmë trafikimin me qenie njerëzore!”./rajonipress/